هەلبەستێن نوو
1
هەوێر... هەوێر!
ئه‌م نه وه‌كو داربه‌ڕیێینه
كو ل زڤستانێ سه‌قه‌م و ل هاڤینێ گه‌رم
ره‌هێن وێ ژ ئاخێ زیز ناكه‌ن
مه‌نجه‌نیقێن مه‌غۆلان و سیكارێن تابۆرێ پێنجێ
نه‌شیان عه‌شقا وێ لار بكه‌ن
یان سه‌متا وێ خوار بكه‌ن
هندێ هزرا خوه تێدا دكه‌م:
نه دڕه‌ڤیت و
نه دكه‌ڤیت و
نه ساخله‌ته‌ك وێ ب گه‌نجێ ئیرۆڤه دچیت
داربه‌ڕییه، هه‌ڤڕكا چیا و كه‌ڤرییه
هندی من ل بیر ل ڤێره‌یه...
كوبارییا تیرۆژكێن تاڤێ پێڤه‌یه و جه‌ریده‌یه
وه راستی بڤێت، ژ مه زێده‌یه!...
*
ل هه‌مبێزا چیایه‌كێ بلند و دوور
تڤیركه‌كێ.. سرت دادا سه‌ر ملێ من و
بووینه رێبوارێن رێكه‌كێ
وه‌سا چێبوو.. عه‌شقێ دلێن مه گرتن و
مه سۆز دا ئێك... ژ هه‌ڤ نه‌قه‌تیێین
ژبۆ چیایێ بارگیرێ مه، سترانا ببێین
لێ تڤیركێ ئاسمان نه‌هێلا كو ل سه‌ر ئاخێ،
كرمان ژ قورمێ من ڤه‌ده‌ت..
هێژ چ په‌ڕێن فڕینێ ژ من شین نه‌ببوون
كو گه‌ردێن بای بكه‌م ڕێبه‌ر و ڕێ بۆ ڤه‌كه‌ت
رۆژ هاتن و چوون، ئه‌م ژێكڤه بوون
لێ گه‌هینا مه د هه‌مبێزا چیایدا
ئه‌فسانه‌یه‌ك ئه‌ڤینێ بوو، د شاراند ئێتوین.
هه‌كو تڤیركێ ل ئاسمانی خوه ڤاڵا دكر
چیقنه‌یا وێ ل سه‌ر ملێن من دبوونه ستێر
سه‌رباز ب دویف منڤه كودی و ل سڵاڤگه‌هێ
ئێغبالا به‌ختی دكره بێر
هه‌كو ل عه‌ردی من خوه بۆ وێ، دكر هه‌ڵامه‌ت
هه‌می ستێر دا ژ دل گازیكه‌ن: هه‌وێر هه‌وێر!
2
پرتێن هه‌سته‌كا چیایی- ١
مناره‌یا مزگه‌فته‌كێ
سینگێ ئاسمانی دڕاند و
پێكۆلا وێ داگیركرنا ئاسمانی بوو.
*
ئاسمان ب وێ فره‌هییا خوه یا پانڤه
چاڤلێكه‌را ده‌ریایێیه
ئه‌وا مرۆڤ پێ لێ دكه‌ن و لێ سوار دبن.
*
ئه‌م شه‌ڕی دكه‌ین..
داكو هه‌ستان سار بكه‌ین و
خوینێ ببینین.
*
ئه‌ز ب هه‌مبێزان چوومە شه‌ڕی
سینگێن نه‌رم، تبلا جه‌له‌پكێ خاڤ كر و
پلانا من نه‌چوو سه‌ری.
*
خه‌مێن كوركبووی ئێكو ئێكو
ل به‌یارێ دل دامه‌زران و
ژێ زا هه‌بوون.
*
من هه‌سته‌ك دانا بن پیێ هه‌سته‌كێ
ئوو خوه گێڵ كر ل به‌ر په‌سته‌كێ
شعر ژێ بوون.
*
په‌یڤ كت كته چوون سه‌مایێ
دناڤ شعرێدا
هه‌ر یه‌ك ژ خوه ته‌ژیتر بوو.
*
په‌نجه‌شێرێ ستێره‌ك خوار و
ستێره‌كا دی، ما به‌نده‌وار
ئه‌ز د شعره‌كێدا به‌رزه بووم.
*
هه‌كو خه‌یالێ چه‌ك داناین
جه‌لته‌یه‌كا مه‌ژی ل من دا و
هه‌ر چوار له‌پێن من فالنج بوون.
3
پرتێن هه‌سته‌كا چیایی- ٢
ل به‌ر لێڤا ده‌ریایه‌كێ
حۆری یێن ده‌ریایێ كۆم ب کۆم
ل پێشوازی یا بارانێ بوون.
*
ل دارستانێ به‌رزه نابم
چونكو هه‌می دار و گیا
به‌وصه‌له‌یێن عه‌شقا منن.
*
دارباهیڤێن گۆڕستانێ
هه‌رده‌م ڕه‌شپۆش و ب خه‌من
نه‌دزانین بێنه دیلانێ.
*
پێشیه‌كێ خه‌و ژ من ڤه‌دڕه‌ڤاند
نامه‌یه‌كێ ژڤانه‌ك چاند
یا ژ منڤه سه‌رخۆشییه.
*
نه‌فه‌له‌كا ل سه‌ر ڕێكێ
هه‌موو ڕێبار ناس دكرن و
هه‌ر ل به‌ر پیا دپه‌رچقی!
*
هه‌كو به‌ره‌ف عه‌ڤرانڤه چوویم
چپكێن بارانێ ل هیڤیا من
عه‌شقا من بوون.
*
من گۆته چووچكه‌ك ئێك باڵی
ئه‌ڤه بۆچی تو هند خه‌مگین و دناڵی
ئه‌ز یێ ل ڤێره..!
*
خۆدیكه‌كا ب دیوارێ ژوورا منڤه
هه‌ر رۆژ تێڕا ل خوه مێزه دكه‌م
ته دبینم!
*
من هه‌می سه‌لكێن خوه یێن سێڤا
ڤالا كرنە بەر دەرگەهى...
مه‌مك ل مه‌یدانێ گرێل بوون
4
كوڕكه‌كی گۆتبوو كچكه‌كێ!
كوڕكه‌كی گۆتبوو كچكه‌كێ: من تو دڤێی!
به‌لگێن كه‌سك ستران گۆتن و ستێرێن گه‌ش..
رۆناهی ژ تاریێ د دۆتن
زه‌ڤیكان خوه هشیار كر و گولان خوه ب به‌ر زنارانڤه
خویل و خواركر
زویركان تۆز ژ خوه دادقوتا و ژبۆ جهێ هه‌ڤبینه‌كێ،
باغێن هاڤینێ خوه كاركر
رووبار رادبوونه سه‌مایێ و پێلان تێلا عودێ سیاركر
خوه به‌رلێڤێن ده‌ریایێ ژی، خوه د ڤێ تایێدا هه‌ڤباركر
ئه‌ڤه هه‌می ژبه‌ر هندێ بوو...
كو ل به‌ر ده‌رێ ماڵه‌كا ژ ئاخێ چێكری،
كوڕكه‌كی گۆتبوو كچكه‌كێ: من تو دڤێی!
*
دێ هێسترا خوه باركه‌م و
دێ چیڤانۆكێن به‌ركوچكا
د كۆشا بیژنێن عاشقدا هێلم
دێ تفه‌نگێ سواركه‌م و
دێ ئاهه‌نگا ژ دایكبوونا عه‌شقێ شێلم
دێ ژ سه‌ر ده‌پێ شانۆیا ژینێ هێمه خوار
شانۆیه‌كا كۆمیدییا بێ مه‌رامه..
دا ته‌ڤ شعرێن خوه ژبۆ ئه‌ڤینیێ بكێلم
لێ من ل دوماهیێ زانی..
ئه‌و ئه‌كته‌رێ سه‌ركه‌فتیی نه‌ئه‌ز بووم
لێ عاشقه‌ك داكه‌فتیێ نیڤ چڤێلم..!
*
هه‌كو به‌ره‌ف شه‌ڕیڤه چوویم
هه‌رسێ ره‌ختێن من د ڤاڵا بوون، به‌س ماچ تێدا
چ پلانێن ب سه‌رداگرتنێ، من ڤێ نه‌بوون
ژ بلی وێ عه‌شقا د ڕێدا
هه‌می چه‌كێ من هه‌ی و نه‌ی، په‌یڤێن كه‌ل بوون
د كه‌لواشێ هه‌ڵبه‌ستێدا
سه‌ربازێن هه‌ردوو لا شكه‌ستن
ب تنێ ئه‌ز.. سه‌ركه‌فتی مامه د قادێدا.
*
5
پەیڤا منۆ پەیڤێ...
تیرێن ته ب به‌ر منڤه دهێن
جرفه‌ك ب دلێ دامایی كه‌فت
ئاوڕه‌كا ره‌نگ پڵنگی...
*
ب چاڤێن منڤه مۆرفینه و
ل سه‌ر تایتلان سه‌مایێ دكه‌ت
خه‌نده‌یا ته...
*
ئۆردییا من تالانکر و
هەستا من ب بارانێ کونکر
بشکوڕینەکێ...
*
سینگێ تە گومبه‌دا مزگه‌فتێیە
په‌یڤا من دیتنا ئه‌رخه‌میدس
دیدارا كه‌ل...
*
هه‌ر چ خه‌ما دنێ هه‌یه، ل خوه جه‌ماندن
هه‌ر رۆژ زێمار ڤه‌دلۆراندن
خه‌ریبیێ!..
*
عه‌وره‌كێ بارانی ئه‌م ئێخسیركرین
به‌ره‌ف گزیرتێن دوور برین
خەونەک...
*
من د چاڤێن خوەدا هەلگرت و
د دلیدا کرە گڵۆپ
سۆزەکا ئەڤینیێ...
*
ژبۆ بێهنه‌كا قه‌بینێ دوور ژ قه‌فه‌سكێ
هه‌می نفشێ خوه خست خه‌فكێ...
كه‌وه‌كی!
*
من باوەر نەدکر تو دێ من هێلى
ب دزیکیڤە.. زەڤیا من کێلى
خیانەت!...
*
دنیایێ ئەز بێ دین کرم
د وەغەرێن سەراباویدا دینکرم
دنیایە.. دنیا!
*
6
ئه‌فۆریزم: موئه‌یه‌د ته‌ییب
هه‌لبژارتن: عارف حیتۆ
[5]
ئه‌ڤ دنیا یا هۆ به‌ردڕیای
ما بهۆسته‌ك و چوار دیوار
*
دلێ من مه‌شكا گریێیه
كوڤان یێ دكێن..
*
خوه ل چه‌رخا دنیایێ بگره
ده‌م رووباره و ئه‌ڤ ئاخه دێ هێته به‌ری.
*
دیجله ئاڤه و ل ئاڤێ دگه‌ڕیت
له‌وا هه‌ر ئاڤه گه‌رده‌نا دیجله‌ی دبڕیت.
*
پاته‌خۆرێن ئه‌هره‌مه‌نی
دلێ مه سۆت، وان كر كه‌نی..!
*
پێلا ژ دلێ ته باركر و
جۆك ژ ته چوون..
*
برینێن وی دگرنژین و ئازارێن وی
ب كینا ره‌شا جه‌للادێ خوه دكه‌نین.
*
سه‌حرا چ ژ ده‌ریایێ پاكتره
ده‌ریا چ ژ سه‌حرایێ چاكتره
*
ستێر، كولیلكێن شه‌ڤێنه
ل باخچه‌یێن ئاسمانی.
*
با- بوهارێ ده‌سته
پائیزێ داربه‌سته
*
ئه‌ڤ چیایه زارۆكه‌كه
هێشتا د مرنێ ناگه‌هیت!
*
خه‌مێن رۆژێنه
شه‌ڤ ته‌نگ و تاری كری.
*
تێشتا من بۆ مێشا
خه‌ونا من بۆ من.
*
د ڤی رویباریدا..
كه‌س ب ئه‌مرێ خودێ نامریت.
*
ب رۆژ دگه‌ل منه
ب شه‌ڤ دگه‌ل رۆژێیه
سیبه‌را من.
*
ژ شه‌ڕێن ناڤێ وان ئاشتی.. بترسه!
ژ دره‌وێن بووینه راستی.. بترسه!
ژ گێله‌شۆكه‌كا د گوهێ گای دا نڤستی
گه‌له‌ك بترسه!...
*
هه‌یڤ.. خه‌نجه‌ره‌كا زیڤی بوو
د ده‌ستێن شه‌ڤێدا...!
*
1
بۆ محسن قۆچان
شه‌كر ژ په‌یڤێن ته دباریت و
د خوینێدا جه‌مبازییا دكه‌ت
چه‌ندین سه‌فه‌رێن نه د پلانا بارانێدا
ب پێنگاڤانڤه كه‌نین و نه‌دیره بوون
مه ل دانگا سپیرێزی چاندن
چه‌ندین خه‌ونێن شه‌كر پێڤه و هێشتا نویسه‌ك
مه دكرنه د هه‌گبا شعرێدا و سنوورێن سۆر
پێ دبه‌زاندن
چاڤێن دیتنێ كه‌لله‌یه‌كێ شه‌كرێ بوون
ل بن ئه‌زمانێ ته حه‌لیا و
گه‌ردیله یێن وێ شریناهیێ كت كته
د جۆكێن خوینێدا ئێورین
كۆمه‌كا هه‌ست و رامانێن نه‌ده‌ركری
ژێ ڤه‌په‌شین
شاعرێن گه‌نج ب دوودلی
په‌رداخێن شه‌ربه‌تێ ئینان
دا ب گه‌ورییا په‌یڤێن هشك و زوها داكه‌ن
سیمه‌رخه‌كێ دادا سه‌ر بانی، ئه‌نسولین!
2
بۆ دایكا دالیایێ
تو یا ل بن گولشلێره‌كا مه‌تینی
پیاسه‌یێن به‌رگری دبینی و بیرییا سوحبه‌تێن
ل سه‌ر قه‌شیلۆی دكه‌ی..
تو یا چوویه دناڤ رامانا په‌یڤه‌كێدا و یارییا پێ دكه‌ی
جار دكه‌یه خواسته و جارنا درك و هه‌می جاران
جه‌ڤه‌نگێن ئولفه‌تێ لێ دكه‌ی
ژ عه‌جه‌ب تو خوه نابینی؟
هه‌ما كه‌زی یێن پرچا په‌یڤان ڤه‌كه و دێ خوه بینی
یا كارێ لێنانا شعره‌كا دی دكه‌ی.
ما كه‌نگی په‌یڤ عه‌مری دنیاسن!
عه‌مر ژی هژماره و ب تیپێن په‌یڤانڤه دووربینه
ستێران دكه‌ته په‌لاتینكێن دادای سه‌ر ده‌ستێ ته و
تاڤه هه‌یڤان دكه‌ته سیتاڤكا هه‌ستێ ته
3
ته‌نگه‌زار مارینی
ته‌نگه‌زارۆ... ته‌نگه‌زارێ مارینی
ما تو یێ دینی؟!
هۆسا ده‌ستێ خوه ل سه‌ر محه‌جه‌لا...
سكرێ سویكێ د نجمینی
جانه‌ك سیحری، د ئاسنیدا ڤه‌دژینی
ما نا بینی...!
ل پشت ته رووباره‌ك، مشتی كۆژان و ئه‌ڤینی؟
ئوو تو ژانان دفه‌همینی
ل پشت ئه‌وان به‌رچاڤكێن ته، دوو چاڤێن گه‌ش
مێزه دكه‌نه وه‌غه‌ره‌ك دوور و یاره‌كا
وه‌غه‌ركری، كو نابینی
ئه‌ز دزانم تو ژ وه‌غه‌ران حه‌ز دكی و
رێژگه‌هان د دلێ خوه‌دا د حه‌وینی
ئه‌ز دزانم تو ب وێ گرنژینا خوه یا سیحری
برینێن هه‌ودای دكه‌وینی
ئوو ڤایرۆسێن كورۆنایێ
ژ كچۆله‌یێن دمدمی هاتین خابیری، ڤه‌دره‌ڤینی
هه‌رده‌م تو یێ هه‌ڤڕك دگه‌ل ئه‌هره‌مه‌ن و شه‌ڤستانا
خه‌نجه‌را ته، ئه‌وا ناڤدایی ب گه‌شبینی
روو دكه‌ته ژینا راوه‌ستایی ب ماته‌مینی
كو دێ سترانه‌كا دلسۆژ ژێ هه‌لینی
ئه‌ڤا د چاڤێن ته‌دا دبینم سه‌یرانه‌كه و
من ناڤێ وێ كر خه‌مگینی
بێ مفایه تو دیداران ل سه‌ر روویێ ئاڤێ بچینی
هه‌ر ئوردی یا تو هه‌سپێن خوه لێ هاویش كه‌ی
دێ من بینی
من ماچه‌ك و سڵاڤه‌ك و سه‌ردانه‌كا كه‌ل یا ل ته
نزا كه‌نگی دێ ب جهئینی؟
4
بۆ كه‌ریم ده‌شتی
دل ل دیدارا دلانه ده‌شتی
خه‌م و ئاخینكێن ڤلڤل و لاڵۆته بوویی
ل سه‌ر رێیا ده‌رێژكرنێ دبنه كه‌شتی
ما كیژان وه‌غه‌ر، دێ به‌ر لێڤا رووبارێن دوور
كه‌ته شعرێن ئه‌یۆناوی ب برینێڤه
مینا خه‌ونێن ژ سنێله‌ییێ ڤه‌رستی و
ب جادده یێن سه‌رگه‌ردانڤه عێلنجیبوویی و ڤه‌ڕشتی
كو په‌یڤه‌كێ ژ دل یان ژ نه‌دل
بدانینه سه‌ر روحا فڕی و جه‌سته‌یێ نوو پاوانكریێ سروشتی
ما كیژان ڤه‌گه‌ر دێ هه‌مبێزا باخچه‌یێن سۆر
ب پشتێڤه كه‌ته پشتی
حه‌وزێن ماسییان هێژ ئازاد و سه‌ربه‌رداینه
ب سینگێ ئاقاریڤه برین
هه‌كو ژ مالا (عه‌لی كه‌له‌ك) زڤڕیمه‌ڤه، ب حه‌ماهیلۆك و نڤشتی
من نه‌دزانی كا سۆراتییا ب سینگێ ته‌ڤه
نوو سۆرگوله‌كا عه‌شقێیه یان ژی خوینه؟!
من نه‌دزانی كا ئه‌و په‌نجه‌را ل سینگێ ته
ده‌رگه‌هه‌كێ چوونه ژوورا به‌هه‌شتێیه، یان برینه!
هه‌می برین ب په‌یڤێن شعرێ سارێژ دبن
لێ ته ئه‌ڤ گورزێ هه‌لبه‌ستان ب ملێ منڤه كرییه بار و
میناكێن شعری ل سه‌ر ئه‌زمانێ من جۆبار
ما دێ كه‌نگی وێ ئاڤا ژ رووباری ڕشتی
ل سه‌ر زاری هه‌ر جویم و جویم، وه‌ك به‌نیشتی!
ئه‌ڤا دبێژم.. ته‌رتیله‌كا ژبیرچوویی یا خه‌مجڤینه
هه‌ڵوێسته‌كه دووتا نه‌بووی، ل مه‌یدانێ كێله‌ستوینه
هه‌كو خه‌لك ژ گلكه‌نا دزڤرن، له‌شێ وان مشت تۆز و غوبار
5
بۆ فادل عومه‌ر
من دڤیا ب دیداره‌كێ، هه‌می بیره‌هی یێن تۆزێ گرتی
د ده‌رازینكا كه‌نینه‌كێدا بچینم
ته‌ڤی خه‌ونێن د دلدا مای
دگه‌ل وه‌غه‌رێن ته بدۆمینم.. كورۆنایێ نه‌هێلا!
من دڤیا هه‌ڤۆكه‌كا باركری ب عه‌شقێ
ژ به‌خچه‌یه‌كێ نووبه‌هتی ڤه‌ژینم و
دارسێڤه‌كا به‌ردار، پێ بهه‌ژینم.. كورۆنایێ نه‌هێلا!
من گه‌له‌ك تشت دڤێیان ل حه‌زره‌تا بارانێ برژینم و
ل به‌ر پی یێن ته ببژكینم.. كورۆنایێ ئه‌و ژی نه‌هێلا!
ئه‌رێ ما كورۆنا خوداڤه‌نده یان ژی شه‌یتان
ما گولله‌یه‌كا گه‌رمه یان ژی گیان
تو.. ئه‌وێ مشتی خه‌لات و عه‌مفه‌ری
هه‌می مال و مولكێ ته هه‌ی، به‌س ئه‌ڤینه و گولپه‌روه‌ری
ژ ته خه‌ریبم و كورۆنا یا بووی ئه‌ژدیها
ته‌ڤ ده‌رگه‌هێن ل تاق و شت
ب سینگێ رێكانڤه كرنه بت
خه‌ریبم و خه‌ریبیێ دگۆت.. شه‌رمینم كو تێرا ناكه‌م!
6
بۆ زانا خه‌لیل
من سلاڤه‌ك كره گولاڤا شعره‌كێ و
ل بن هنگلێ زانا خه‌لیلی ره‌شاند بوو
ئه‌و د خوه‌دا، شاعره‌كێ ئه‌ڤینداره
ب كۆمه‌كا داخێن عه‌شقێ برینداره
خه‌ریبییه‌ك ژبۆ ئاخێ و پاپۆسه‌كا ژ دل بۆ چرای
حه‌زا ئاڤێ و ئه‌ڤینییا بای
هه‌ر رۆژ ل ئاستانێ مه‌خه‌لن دوو- سێباره
ئه‌وان كچكێن مه‌كته‌بلی یێن پرچا وان زه‌ر
مه‌وكبه‌كێ په‌یڤێن گۆتیی د رێكا ویدا هه‌لاند بوو
بێژه‌ره‌كێ رادیۆیێ دگۆت..
شاعره‌كێ عاشق هه‌یه و گرنژینا وی ب رامانێڤه دۆبه‌یه
ب بێهۆده‌یی.. دناڤ عه‌شقێدا یێ به‌رزه بووی
هه‌ر كه‌سه‌كێ نۆچه‌یه‌كا راست ژێ بزانیت
یان پلانا دیتنا وی بۆ خوه بدانیت
دێ بیته ره‌نگێ راستیێ و ده‌نگێ وی دێ بیت كباره
پۆلیسێن ده‌وله‌تێ هاتن ب زباره
خه‌ونه‌كێ خر گه‌هاندن ئێك
د پاخلاندا، پاوانكری بوون هه‌می رێك
هه‌كو سپێدێ.. چاڤێن پۆلیسان حولی بووین
من د چاڤێن واندا ددیت
زانا خه‌لیل.. یێ بوویه قه‌لا و مناره.
1
دلبەرا دوور ژ ویصالێ
چوارینه‌یێن دوقۆلی ل ناڤبه‌را عارف حیتۆ و شه‌مال ئاكره‌یی
(1)
(ع)
دلبەرێ تە چەوا دلدا
من بهێلی دناڤ دلدا
ب شەمعا سوور قفلدەی و
تەڤ ژڤانێن مە ددلدا
(ش)
ئەو دلبەرا خوەدی دل بەر
نە ڤینوسە و نە نیلوڤەر
ب شەمعا سوور دل قفلدا و
ب جارەكێ دل كر دووكەر
(ع)
كرە دووكەر دل دلبەرێ
دل بۆ ئاتەش ژبەر كەسەرێ
هەر كەسەرا ئەو ژێدەر بیت
سلاڤەكە و دل چاڤەڕێ
(ش)
ل چاڤەڕێ یا سلاڤا
سیزارا ئاڤا سیلاڤا
هەر مام و مام، لێ نەهات ئەو
ل گەل بێهنا تەڤ گولاڤا
2
دلبەرا دوور ژ ویصالێ
چوارینه‌یێن دوقۆلی ل ناڤبه‌را عارف حیتۆ و شه‌مال ئاكره‌یی
(2)
(ع)
تووتى یا ژبەر خویل دبن تووتى
ئەڤ جانێ هێژ ل بەر جووتى
تە ب ئاوڕان یێ ڤەڕۆتى
عەمر بۆرى، بۆ تە زەکات
(ش)
ل پەنا من تۆ نەهاتى
یا سێڤە سۆرێن ئەخلاتى
سینە ژ قەند و نەباتى
مێهڤانا من، لێ نەهات
(ع)
ل دلى بەهى و خەم بوونە شیر
ل جەستەى پاڵە بوون بێ تەکبیر
ژبۆ هەستان نینە تەقدیر
لەو بێدەنگە و هێژ ل سبات
(ش)
ئیرۆ ل دلى بەهى و خەمە
ئاسمانێ وى مژ و تەمە
وەلى مە، ئەو ژى شەمە
هەڕفى ل من ئەو کەلات
3
دلبەرا دوور ژ ویصالێ
چوارینه‌یێن دوقۆلی ل ناڤبه‌را عارف حیتۆ و شه‌مال ئاكره‌یی
(3)
(ع)
من خەمەک راکر ئێک دانا
من سلبوون خست بەر ددانا
هەر رۆژ دمامە ل جێ ژڤانا
ژبۆ گاڤەک ڕندا ویصالێ
(ش)
ویصالە خەما درەڤینە
دوورى فیغانا دجڤینە
گەر ئەو نەهێ ل من شینە
هەر تم دل بۆ وێ دناڵێ
(ع)
ویصالا تە بۆ من مەرەق
پێ ڤەهاندن شعر و سەبەق
تێکهەلبوون ئێڤارى و شەفەق
لێ چ بکەم ژ دەردێ ئێغبالێ
(ش)
دەردێ ئێغبالێ بێ نۆژە
خەبتین ب شەڤ و رۆژە
بێ هەدارە دل دسۆژە
ئاخ ژ دەردێ تە و ویصالێ
4
دلبەرا دوور ژ ویصالێ
چوارینه‌یێن دوقۆلی ل ناڤبه‌را عارف حیتۆ و شه‌مال ئاكره‌یی
(4)
(ع)
گولەک دبەر بەرچەما تەرا دکەنى
شنەبایەکێ هوین، ماچ کر ئەنى
تیر ژ دیتنا کەل پێڤە بوون ڕەنى
رووبار دووتا کر پر و بەنداڤا
(ش)
گولا پەرچەمێ ژ من بر سەودا
نەهشکرم هەردەم ئەزێ دخەودا
خەم ل من مەخەل بوون کولا هەودا
خەندقاندم دەریا هەردوو چاڤا
(ع)
هەر چ بەنداڤا ل جانى شین بووى
هەر چ ژڤانێ ب بێدەستى ژبیر چووى
هەر چ ئێشانا ژ برینێ ڤەبووى
دیدارێ پڕ دکەت ژ سیپە و سیلاڤا
(ش)
جان ل بەندەمانێ نابت بێزار
ژڤانێ مەبوو نە ئیساڵ لێ پێرار
هەردێ مینم تا ئەبەد ئەز رێدار
باوەرم دێ هەر گەهم پەڕاڤا
5
دلبەرا دوور ژ ویصالێ
چوارینه‌یێن دوقۆلی ل ناڤبه‌را عارف حیتۆ و شه‌مال ئاكره‌یی
(5)
(ش)
غەرقبوون دناڤ عەشقێدا رزگاربوونە
بێ عەشق و ئەڤینى ژیان ژەنگاربوونە
هەر ژ ئەزەل هەتا نها عەقل و دل
هەر تم ل شەرگەها وێ بەرهنگاربوونە
(ع)
بەرهنگارى یا وێ هەوڵەکا موستەحیلە
هەر نازەکا ژێ دەرکەڤیت، مە قەبیلە
ژ ئەزەلدا و هەتا نها... چاڤەرێمە و
هەکو دهێتن، ژبۆ رێبازێ دەلیلە
(ش)
دەلیل و گروڤێن هاتنا وێ نینە
نە ل من دگەڕە و نە ئیمێلان دشینە
ما هەتا کەنگى ئەم هەر دێ چاڤەڕێ بین
چاڤ ماندى بوون و سینە ژى تەڤ بۆ خوینە
(ع)
خوینێ ژ سینگى هەڵاڤێت جووک و جۆبار
هەودانەڤە تەڤ برینێن پار و پێرار
کو قەرینا گیانێ مت د خلوێڤە
خەمێن ژ دووریێ کورکبووى کرنە هزار
6
دلبەرا دوور ژ ویصالێ
چوارینه‌یێن دوقۆلی ل ناڤبه‌را عارف حیتۆ و شه‌مال ئاكره‌یی
(6)
(ش)
ڤاڵا نابیت تویکێ عەشق و ڤینێ
ئەڤجا چ خەم بن تێدا یان خۆشى
ئەڤراز و نشیڤن رۆژێن ژینێ
دێ ژ پێکێن تاڵ و شرین نۆشى
(ع)
تاڵ و شرین پەرداغێ ژینێیە
ژێ د نۆشم ب دلێ پڕ برین
هەمى دەمان ئەڤ رەوشا عەشقێیە
ژێ د رژیێت ئەو برینا مشت خوین
(ش)
برین و کوڤانێن ڤى کاروانى
ب هوسانێ عەشقێ مە سەقا دکەن
هلۆن هزرێ پاک بکەین ژ زیوانى
دا نەخۆشى ل گەل وان بار بکەن
(ع)
هزرا پاکە ئەڤ دل کرییە سوولاڤ
ژێ دباریت ئنیەت و رازێن چاک
عەشقا من رەفتارەک مشتى گولاڤ
ژ گەهینێ شین دبن چق و شاک
1
په‌نجه‌شێر
هه‌ر ژه‌مه‌كا كیمیكێ ل بن داره‌كا گه‌ش
به‌لگ پێ د كه‌ڤنه سه‌مایێ و خه‌وندیتنێ
لێ د مندا.. دبیته به‌ڵا و داڤێن پرچا من هاركرن
خوه ل سه‌ر سه‌رێ من ناگرن
مینا به‌لگێن پاییزگرتی
تم د وه‌ریێن و دهه‌مبێزا ئاخا عاشقدا بوون گرتی..
ئه‌ڤینی یا ئاخا سار و داڤێن كه‌فتی
ئێشانه‌كه ژ په‌نجێن شێرپه‌نجێ ڤه‌گرتی.
2
چیایێن كال
پاپۆسێ بۆ ئاخا ته‌ڕ و به‌نگین دبه‌ن
هه‌ر داره‌كا ژبه‌ر سینگێ ئاخێ بچیتن
زارۆكه‌كا نازداركرییا هیدار بوویه
ب ڤه‌گه‌ڕێ و ب ژڤانی و ب هه‌ستێن كه‌ل
خه‌ریبییه‌كا بێ ده‌لنگه و
ل به‌ر ده‌رگه‌هێ هه‌ستا خه‌مگین بوویه مه‌خه‌ل
گێنگه‌شه‌یه‌ك سار و مته
هه‌ر ژ ئاده‌می هه‌تا ئه‌زه‌ل
دا ل دیوانا محسن قۆچان
نه‌مینیتن هه‌لبه‌سته‌كا ئه‌یۆناوی ب دوو گوهێن به‌ل.
3
ڤه‌گه‌ڕیان
پرچا ته به‌خچه‌یه‌ك بوو
ل ره‌خ كانیكێن كه‌وسه‌رێ
هه‌كو گولان خوه دارده‌ستی ته‌مێ كرین
شه‌ڤێ دادا و ته‌ڤ تیرۆریست
بوونه ئاغا یێن موغبه‌رێ
تو بۆ ناهێی ئه‌م ده‌همه‌نێن خوه داقوتین
ژ تۆزا ب ڕێڤه و ژ ئه‌سه‌رێ
بزڤڕینه‌ڤه دناڤ خه‌ونادا و وان چیرۆكێن
مشت دلینی ل ده‌ورێ به‌رێ.
4
کابووس
من دخەودا نالینەک دیت، یا دەنگ بلند
ب دەهمەنا کابویسەکا ترسێنەرڤە
ژ بورجى دادکەفت بەر دەرگەهان
هەکو.. شەڤ شکەستى و بوویە ئەلند
ئەو نالینا ب قێژى یێن توند
ببوو سیمایێ، هەموو دەرێن چەمیایى و کند.
*
٢٠١٩
5
یاد
ئەڤە چه‌ندین پاییز بۆرین..
هێشتا بێهنا ته یا فڕی
ژ باخچەیێ ماڵا مە دهێت
هێشتا گەردێن هەناسا تە
ل هنداڤ سەرێ من سترانێن چووچکانە
گرنژینا تە- ئەوا د چاڤێن مندا مۆرفین
ب تایتلێن بازاڕیڤه سەمایێ دکەت
هەر شوستەیێ د رێکا مندا
ب دیتنا تەڤە سەرگەردانە
هەستێن من یێن دۆتى و خۆپان
ب دارا ژینێڤە د وەریێن و
د شەڤستانا یادا تەدا گەش چرانە
تو.. ئەوێ نیڤەک ب ئەنیا منڤە نۆژ و
نیڤەکا دى، ب عەرشێ خودێڤە بووى تیرۆژ
ئەوێ د دلێ مندا خوین و
ب دەهمەنا گەردوونێڤە بوویە نیڤین
ئەز یێ ل بەندا سڵاڤەکێ، ژ دەف تە بهێت
د خەودا بیت ژى، هەر من دڤێت
دا کاروانێ خەمێن کورکبوویى
ئێکوئێکو ل بەیارێ دل...
6
شاعر
پێشكێشه بۆ سعدالله په‌رۆش
شاعر هه‌رده‌م وه‌غه‌رێ دكه‌ن
دگه‌ل دیونیسیسی به‌حسی خۆشیێ دكه‌ن و
دگه‌ل هادیسی قه‌هوه‌یه‌كا ته‌حل فڕ دكه‌ن
جار ل به‌هه‌شتێ ده‌هواتینه و جار ل جه‌هنه‌مێ نیڤ سۆتینه
جار بڕیارده‌رن و جارنا ژ هه‌موو حسابان ڤه‌ده‌رن
شاعر وه‌غه‌ران و ئه‌ڤینیێ دكه‌ن، ئه‌ڤینیه‌كا مشت خه‌نده و كه‌ن
هه‌ڤڕكی یا هێزا شه‌ڤێ و ڕه‌ڤێ دكه‌ن
دگه‌ل بوسایدۆنی دچنه‌ڤه و ب ئه‌دونیسی دزڤرنه‌ڤه
شاعر هه‌می تشتان دكه‌ن، مرن تێ نه‌بیت.
په‌یڤێن وان...
ل ئاسمانێ ژیانێ د فڕن و قه‌ت نامرن.
*
2020
هایكۆ- 1
1
ئه‌ز یێ ب تنێ ل وه‌رزان دگه‌ڕم
دا خوه یێ نهیایی ببینم
!كێفه‌راته
2
وه‌رزێن گولا..
هه‌رده‌م گه‌شن ب هاتنا ته
!ستری وه‌رین
3
به‌فر خالا قه‌ده‌رێیه
قه‌ده‌ره‌كا سپی سپی
!وه‌ك ژیانێ
4
خه‌م كچه‌كا كورده
خوه دخه‌ملینیت و ڤڕا دكه‌ت
!جڤاكیبوون
5
هه‌رده‌م به‌حسی دیدارا دكر
ما كا دیدار؟
!تۆپ سه‌رمیره
6
تبلێن گه‌رم
ل سه‌ر جه‌له‌بكێ ئاغانه
كوا رووگه‌ها من یێ عاشق؟
7
لاپه‌رێن تاریێ گه‌له‌كن
مینا كاروانێن خه‌له‌كن
!مۆمێن من یێن ل به‌ر بارانێ
8
په‌یڤ سه‌مایێ ژبۆ من دكه‌ن
دا كوینه‌كی بۆ بدانم و
!غروورا خوه لێ بره‌شینم
هایكۆ- 2
1
ده‌همه‌نێن شه‌ڤێ ب جنابه‌تن
ل هیڤی یا ئه‌رێ یا لێڤێن من
!هه‌موو ژڤان بوونه به‌نده
2
هیڤی قه‌یره‌نه، پاییزۆكا دبێن و
ب كوته‌كی ژێ دزێن
!سیناهی
3
هه‌می هه‌لما ل ئاسمانی
هه‌ناسا منه ل به‌ر ده‌رێ میری
!ژ قه‌هرا دووكه‌ر بووی
4
نێرینێن ته
داخوازه‌كا گه‌رما ره‌ڤینێیه
به‌ر ب هاتنێ
5
روندكێن كه‌ل
یاریپێكرنا هه‌ستایه
!ب چاڤێن هه‌ل
هایكۆ- 3
1
ئاڤزه یێن هزرێ
په‌یڤێن نه‌گۆتی ژێ رژیان و
بوونه‌ڤه ڕێ!
2
ما دۆزه‌خ چییه
ژبلی ژیانا مرۆڤان
به‌نده‌مانی
3
ئه‌م شه‌ڕی دكه‌ین..
داكو هه‌ژار هه‌ژارتر بن
ئوو ده‌وله‌مه‌ند په‌رلاختر بن
4
هندى هند تە مەزن دبینم
ل بەر دەهمەنا تە بچووک دبم
!وه‌فاداری
5
گەلەک کچکا هەلبەستێن من
ل بن بالیفکێن خوە ڤەدشارتن
لێ تەڤ هەلبەست بەس داردەستى کچکەکێ بوون
6
هندى ل غاردانێ بکەڤى..
دێ رابییەڤە
لەو تەسلیمبوون شاشى و رەڤە
7
'چونکو هەردەم،
ب ڕاڤەکرنێڤە دێ هێر بى
8
نە گرنگە.. دڕک و سترییان ل بەر من دچینن
هەر رۆژ دێ باغى ئاڤدەم و
گولان چینم
هایكۆ- 4
1
ئەو سترانا ڤەدگێرم و ڤەدگێرمەڤە
سەربۆرەکا ژینا منە
یا ئاڤز دبیت
2
هەر چیرۆکا ژینا خوە تێدا نەبینى
وەک هژمارتنا گووزانە،
ئەگەر چ ژێ نەخولقینى
3
تە بۆ من بەحسى عەشقێ کر
لێ عەشقا من نهێنییەکە و ناهێت گۆتن
یارا كه‌ڤن
4
بابێ من.. هەمى دەرگەھ ل من ڤەکرن
من نەدزانى دەران ڤەکەم
هەتاکو ئەز ژى بوویمە باب
5
من ب ئاخێڤە خوە مت کر
ئاخێ ئاخ دا من و ناڤەکێ گەش
شه‌هید
6
هەکو من دەرگەھ ڤەکرین
من نەدزانى چ ل پشت هەیه
!مایتێكرن
7
هەمى رێک دێ گەهنە ئاشى
لێ یا گرنگ، کا دێ کیژان ژێ بژێرى و
!چه‌وا دێ ژێك ڤه‌وژێری
8
تێهزرینێ خوە هاڤێت جانى ب هارى
ژبیرکرنێ ئەڤ هزرە بەردان ئاقارى و
!دێ ئێك هه‌بیت راكه‌ت باری
هایكۆ- 5
1
من ژ خورتى یا ئاڤێ شەرمە
هەم تەعمیدە و هەم ژى گەفە
چوونا من بوو!
2
هندى ئەز هەى
درەوەکا ب تنێ من دگەل خوە یا کرى
ئەز دێ ژ ڤى وارى بارکەم و دێ وەغەرکەم!
3
هەمى خەون من دان دەست باى
کو کاروانێ ب ڕێڤە ماى
هشیار ببیت ژ خه‌وا گران
4
هەمى زەڤى ب بوهارێ دووجان ببوون
لێ ئەز بەلگەک پاییزى بووم
ژ بەرمایکێن عەمریڤە ماى
5
ل گوندێ مە،
بلبلەکى گولەک خاپاند
رەزڤانى بەخچە شەوتاند
6
ل کافێیەکا ڤى باژێرى
ب دەهان داخێن عەشقا سۆتى
دخولیدانکاندا د مەلصین
7
هەکو شەڤ داددەتە خانى
حەزێن بەزەک تەنا دبن
ب هاتنا ته
8
ژ نەزانى.. من خوە دا دەستێ قەدەرێ
نە من رۆناهى یا کەل دیت،
نە ژى چرایێ فەنەرێ
9
من ئنیەتێن خوە ل بەر تە بەلى کرن
لێ من وە دیت کو ئەو ئنیەت
تەڤ یێن تەنە
-
چوارینە
چوارینە- 1
تۆ بەندەکا ئەڤینیێ ژ وێ گەورى یا زەلال بەردە
حەیرانەکێ و هەستەکا کەل بپەقینە ووردە ووردە
کەسەک نینە ل بەر مەزیقێ نە هەلچیت و پێ کورک نەبیت
دەرێ دلى دێ ڤەبیت و هێنە لادان هەمى پەردە
*
بێى ئەڤینێ، ژیێ ژیانێ بچویکە
خەما پاڤێ و نهێنیا مە دەرەهیکە
بەرى رۆژا مە ئاڤا ببیت، بێژە بەلێ
ئەگەر نە، دێ روویێ مە پڕ بیت خوریکە
*
تۆ گولەک بووى، گەش ل بەر بایێ سحارێ
شنەبایەک، هوین و عەلیل ژ بوهارێ
تۆ شعرەکا نازک و خۆش و ڤەبى بووى
هێدى هێدى ژ چاڤێن من دهاتى خوارێ
چوارینە- 2
من تەڤ حەزێن ئاگر پێڤە زیندان کرن
هەمى دیتن د بن تەمێڤە وێران کرن
دا ل حزوورا تە بێگەرد بم, لێ دوورى یا تە
ب توندى و هارى، پێنگاڤێن من فالنج کرن
*
ژ دیدارا تە خەریبم... بێقام خەریب
نەخۆشەکم ژ دەردێ دوورى یا تە بێ تەبیب
من دەردێ خوە کرە گومتل ب دەرگەهیڤە
ویصالەک دەرمانێ دلە، رندا حەبیب
*
من قەرفاند و پرتکاند گوزکێ خەما
ژنوو نژاند، ئەو دلکێ ل هیڤیا تە ڤەما
دوتمیرەکا نڤستییە بەرسڤا تە...
ژ خامەى زا، شعرەک ژ ئێش و ئەلەما
چوارینە- 3
هێژ پەیڤێن من ل حەزرەتا تە شەرمینن
بەس خویسارێ و شەیدایى یا کەسک دبینن
هەکو تۆ دهێى، شنەبایێ سحارێ دزێت
پەیڤ ب گەرمى ل سەمایێ خوە د ئەڤینن
*
من چ یادێن خۆش و شەهى دگەل تە نەبوون
من چ سۆزێن ب شیرى مەهى ددەستدا نەبوون
خەمێ سەرێن مە کرنە جووت، ب داڵەهى
ل بەر دەهمەنا حەزەکا گەش چەمیا گەردوون
*
مژێ کورى یا خوە یا هێلایە د بەفرێ را
حەزا من بۆ دیتنا تە ما د تەقنێ را
هندى هاتمێ کو خوە ژ دوورى یا تە بکڕم
خەریبى ما دبەر بەرچەما دیتنێ را
چوارینە- 4
پەیڤێن خۆش تۆ دەرەهیکە ب ئاشکرایى
پەیڤ یاوەرێن عاشقانن... ب صەفایى
عەشق گیانێ بەخشندەیى و هەتاڤێیە
بەهەشتێ رویدکەت دنیایێ، ب تەوقایى
*
ئاگرێ عەشقا تە یارێ خەو ژ چاڤێن من ڤەرەڤاند
حەز و نالینێن ویصالێ روویێ رۆژێ ل من کەناند
بێى ئەڤینێ بەلگەکێ هشک و وەریمە د لەپێ باى دا
وەک پەلەکا کز و بێ تێن.. بەندکێ ژیانێ ل من قەتاند
*
د ئاگرێ عەشقا تەدا.. مەعشوقەکێ بەندەوارم
ترپێن دلى بلەز لێددەن، شەیدایەکێ بێ قەرارم
چ رۆژەکا نە چ رۆژە.. هەکو دلێ کەل مت دبیت
ل بەندا دیتنا یارا دوور دل، هەر تم و تم تەنگەزارم
چوارینە- 5
تۆ ئەو گولا خوناڤگرتى، ل سحاران شەهى و جوان
تۆ ئەو ئاخا د خوینا مندا بوویە هیڤى و گەرمى و ژیان
تۆ.. بەختێ من، ئەوێ تە خوە ژ من ڤەدزى و بوویە مشەخت
ل وەڵاتێن غەریبیێ و تە ئەز هێلایم پیرێ ب گوچان
*
وێ فالکەرا پیر و فەقیر ب دوودلى دگۆت
وەسا دیارە تۆ دگەل یارێ نابییە جووت
هندى من ل بیر، ئەز یێ ب تنێ ڕێ د شەقینم
حەزا من یا ئاگر پێڤە، ژیێ من دخۆت
*
ئەرێ بۆ کێ خەمێن کورکبوویى، ددەیە باى
خەم تنگژى و ل بەندەرێ ئالفێ باى
قەندا لێڤان.. دێ گونەهان خەوینیت و
ب دیتنا تە، شاشى یێن من دێ دەى بەرباى
چوارینە- 6
چاڤێ من یێ ل پێشوازیێ، کەفت سەمایێ
پێنگاڤێن من دئازریێن و هەدار نایێ
ل بەندەمانا دیتنا تە، وەک صوفییان
ئەگەر بهێى، دێ بۆ تە رویکەم دنیایێ
*
ئەو خانما وەک قەقنەسى، ل سەر هەستێن من دادایى
ل ناڤبەرا ئەرێنیێ و نەرێنیێ، هەر دوو تایى
د رێکا مندا رازایى و د دلێ مندا خەزایى
گەر نەهێى ژى، ل شەڤستانا ژیانا من هەر چرایى
*
تۆ نە ب تنێ ژنەک جوانى کو ژبەر تە بکەڤمە گومانێ
لێ تۆ هەمى ژنێن جوانى کو پێ ب دۆمینم ژیانێ
تۆ رەوشەنا رێکا تارى و خەربەندێ خەشمێن یادگارى
دێ بۆ تە ڤەکەم دەرگەهى و پێ کەنینم خر جیهانێ
چوارینە- 7
ئەز ئەوم یێ جوانى یا تە ل سەر بەرپەرێ ژینێ خواندى
ژبۆ دەرگەهێ هەبوونا تە، من ئۆمێدا مانێ چاندى
دێ کا وەرە گونەهەکا ساڤا بکەین، داکو ببینى
چەوا گونەھ ل حزوورا تە، دبیتە پەپووکەک چغاندى
*
تۆ عاشقى.. وەکو هەسپێ کەحێل بشهە
ئەڤ دوودلییە، هەڵوێستەکێ شاش و کوهە
یان بەرەف دیدارێ وەرە، یان ژى هەرە
ل بەر هەتاڤێ.. ئەوا ژ تە ڤەدبیت بەس خوهە
*
دەمێ ب توندى، من ب باوەشێڤە گڤاشتى
ئەو قەمیسێ هینگى ل بەر من، ما نە شووشتى
دا هەناسە و ئەو گولاڤا پێڤە نووشتى
هەر بمینیت و دێ بۆ خوە کەمە نڤشتى
چوارینە- 8
خوەزى ماچەک، من ژ لێڤێن تە تام کربا
یان هەستەک تە، ب ئیختیارى پاوان کر با
یان ژى عەشق ژ دەف مەلاى رەوان کر با
هینگى بلا مال و مولکێ من تە بر با
*
کانى یێن خەما ب رێکا تەڤە، خەم رەڤینن
بلبلێن مەست پرێن عەشقێ ب باى د نەخشینن
ما تا کەنگى هەستێن من یێن ئەیۆناوى
دێ کەلن و دێ ل بەندا دیتنا تە مینن
*
حەزا ژینێ د چاڤێن تەدا و عەشق ژ کاڤلانى هاتە دەر
ئەڤجا چەوا ژێ نا چنین روو کەنینێ و بەرهەمێن تەر
ئەڤ ئەکسیرا نەمریێیە د رێکا تەدا سەمایێ دکەت
گەر پاش بێخى و خوە لێ نەدەى، دێ پەشیمان بى هەروهەر
چوارینە- 9
دلەکێ ژار.. د سینگێ مندا دنالیت و زیندانییە
شەرمێ ژ ئاخێ و ئاڤێ دکەت، ب نەژادیڤە قوربانییە
چەند من دڤیا ئەڤى دلێ خوە بشکێنم یان نەهیکەم
لێ وێ عەشقا دوورپێچکرى.. د رێکا مندا پاوانییە
*
تۆ گولەکا جوانترى.. ژ نیسانۆکا
تۆ شعرەکا شەهیترى.. ژ شەکرۆکا
تۆز دێ دادەت روویێ گولان، وەلێ ئەمما
ئەز و تۆ دێ ب دویف ئێکڤە بین وەک بەکرۆکا
*
گەر تە بڕیم و هشککرن تەڤ چقێن من
ژ پەشێمانى بوویە عەودال، ل سەر گۆڕێ من
نۆچەیەکى ژ سەرتوخیبى بینە و بێژە
ئەڤە یار هات.. گیان دێ هێتە لەشێ من
ئه‌فۆریزم
ئه‌فۆریزم-1
ڤیان شەڕەنیخا هەستێیە
ددەستێ مندا بوویە ژیان
*
پەنجەرەیێن دوور وەک عەشقێنە
تەڤ هەستێن من، بۆ دئازریێن
*
هێسانترین دەر ژبۆ ڤەکرنێ
پەیڤا نەرم و ئەڤیندارە
*
ژیان کوتەلا ئاشێیە
ل سەر دۆرا من بوویە لەیلان
*
هندەک هەڤال وەک مارانن
بێدەنگ و ب ترس، نە هەڤالن
*
ئەز و شعر دوو عاشقین
ژهەڤدوور و تێکهەلکێشایى
*
هەردەم.. د فەروارا تەدا بێدەنگم
هەم رەتکرن و هەم رازیبوون
ئه‌فۆریزم-2
ئۆل.. ئەفیۆنە دخوینا مندا
جار تەناکەرە و جار بێهۆشکەر
*
ئەڤ ژیانە دارستانە
تنێ مێرگا مشت ڕەنگە گول
دبیتە پەنا و پێکڤەژیان
*
ئەز ب تنێمە ل مەیدانێ
سوار هاتن و گەرم بوو قادا جدیدانێ
*
دەنگێ من یێ ژ من کەفتى و دناڤ باخچەیدا بەرزە بوو
دیوار ب گوهن...
*
کەسێ بێ پشت
وەک زەڤیەکا رویت رویسە ل بەر بارانێ
*
داکو هەردەم د نەمر بین، مە تۆڤێ خوە چاند ل عەردى
عەرد هەمى ببۆ ئەڤین
*
ئەز خەونێن خوە ژبیر ناکەم
هەم ڕێباز و هەم ڕێنیشان، داکەفتنێ دکەنە ڕابوون
ئه‌فۆریزم-3
ژ بچووکاتى من حەزەکا دێرین هەبوو
کو جیهانێ بکەمە تەپە و ل بەر پێنا من مرید بیت
لێ حەزا من.. دکۆگایا تەمەنیڤە مشتانە بوو
*
بابێ من خر جیهان ڤێ بوو
لێ هەکو ئەز ژنوو بوویمە باب
ئەو جیهانە تنێ ئەز بووم
*
ئەڤە ئەز و سیبەرا خوە ب هەڤڕا هاتین
سیبەرا من نەوەک منە، دێ زەڤى یێن تەڕ شەوتینیت
*
هەر سوارەکێ نە سەتمیت
دەمێ دکەڤیت، نزانیت کانێ دێ چەوا رابیتەڤە
*
من خوە ناسکر.. هەموو گناوەر رێز ب رێز
ل بەر دەرێ من نۆبا دگرن
*
من پرسیارا خوە دانا بەردەست قەدەرێ
لێ قەدەرێ پرسیارەکا دن ژ پرسێ ئینا دەرێ
*
دایکا من پەڕندەک ئاسمانییە
خوداڤەندا وجوودێیە و هەردەم ژبۆ من قوربانییە
ئه‌فۆریزم- 4
نەگرنگە کا دێ چەوا من ئاخێڤى
گرنگ ئەوە ...
کا چەوا دێ پەیڤێن سەربەرداى بشێڤى
*
ئەز ل تە دگەڕام دا خوە ببینم
ئەز ل خوە دگەڕیام دا تە ببینم
د لێگەریانێدا هاوسەنگم
*
قەهرەمانان خر چیرۆکێن خوە گۆتن و ئەز ژێ ڤەدەر
ما دێ چەوا ڤێ شەڤستانێ قەبوولکەم
*
ئەز کەسەکێ پێگیرم و هەموو گومانێن خەلکێ دى
ب کێفەراتا خوەڤە مۆر دکەم
*
ئەڤ بڕیارێن بلەز و سەرپێ
وەک تفەنگێن داوەتیانن ل شەهیانێ
*
ل بەر دەرگەهێ مالا مەزن
وژدانێ خوە خەساندى دیت
هەموو مالێن مە دبچووکن!
ئه‌فۆریزم- 5
جارەک ب تنێ تە خاپاندم
هەمى ژیێ خوە تە کرە بەندەمانى و ل مێرگا خوە نەحەواندم
*
هزار گۆتن.. من کرنە قوربانى کریارەکێ
دا تێ بگەهم، ئەڤێ رەوشێ و تدارەکێ
*
ئەز بووم خودان تەخت و تیجان
لێ کەس نەبوو پاپۆسێ ببەت
ژبۆ وێ حەزا ب سوبە دووجان
*
ئەز دزانم تۆ ژ من حەز دکى
ل دیدارا تە دبمە مرید و ل حزوورا من، تۆ دپرتکى
*
ئەز نە هاتبوومە ژڤانى
چل سالێن دى، دێ خەمان جویم ژ پەشێمانى
*
من و هەوران نۆبانێیە، جار ئەز دبارم، جار ئەو دبارن
مە هەردووان ژبەر دەردێ ڤیانێیە
*
لەشکەرەکێ گولان داگیرکرم
لێ من تنێ سترى ددیتن
ئه‌فۆریزم- 6
ئەز دارەکا نەقریایى
ل بەر هوڕەباى.. سەمایێ دکەم
*
ئەز ب تنێمە و خودێ ژى هەردەم ب تنێیە
ئەز و خودێ هەڤدەرد و هەردەم خەمبارین
*
پەلاتینکا رۆناهیخواز
ب رۆناهیێ دهێتە سۆهتن
*
پشتى شەڕى... میوزیک من دکەتە مرۆڤ!
*
ئەز نە ئەوم یێ تۆ دبینى
کۆمەک هەستێن ئازراندى، ددلێ ژاردا حێبەتینە
*
ئەوێ هاڤى، هەکو دکەڤیتە سەر سفرێ
هەمى تشتى دخۆت ب خاڤى
*
هەر شاشى یا د رێکا مندا، من یا کرى
ما دێ گازندا ژ کێ کەم؟!
*
هەردەم دبێژین خوزى یێن بەرێ
چونکو بەرێ بێگونەھ بوو
ئه‌فۆریزم- 7
مادەم تۆ دێ ئەڤیندار بى
فەرە فێر بى، ل ناڤ گولستانێ بژى
*
سرێ گەهێن من خاڤکرن
ل بەندا بوهارێ چاڤەڕێ
*
هەکو ئەز دار
زویرێن بەرانبەر سۆتى بوون
*
من تۆ دڤێى ب گوندیکانى
ڤیانەکا راست و سادە
*
تارستانێ دادا چەما و
دارمێو ل هەڤ بوونە ڕەشە
*
پێکێ مەیێ ددەستێ مندا ئاڵایەکە
خەییامى یێ بلند کرى
*
هەمى سەربۆرێ بدە باى
کو چەند پەندێن تێرکەر نەبوون ژ دەف بەیدەباى
ئه‌فۆریزم- 8
هەکو جەنگێ دەرگەھ قوتاین
چ سواران دەر ڤەنەکر.. هەمى دخەو بوون
*
کو نێرگزەک عەرەبیێ نزانیتن ب موخەییەر
سەرێ وێ کەفت بەر بڕینێ
دا ل بن ئاڵایێ (الله اکبر)ێ ببیتە موسەییەر
*
ل ئەڤى ژیێ کانوونى بوویى
بوهار کەنینێ پڕ ناکەن
*
دەمێ تە گۆتى حەز ژ تە دکەم
ئەڤینیێ کوینێ خوە ژ وارى بار کربوو
*
چ برینێن من ساخ نەبوون
چونکو هێشتا یێ ل هیڤیا تە چاڤەڕێمە
*
ئەز بەردەوام دگەل تە ب هەڤڕکم
دا تە بینم سەر رێیا راسا
یان ژى باوەرکەم تۆ یێ راست
ئه‌فۆریزم- 9
ئەوێ ژ مرنێ نەترسیت
هێژ ژیانێ روو نەدایێ کو بۆ بکەنیت
*
ب شەڤ و رۆژ ل تە دگەریام
هەتا شیایم خوە ببینم
*
گەر نەشیا بم تە بگوهۆڕم
ئەز دێ رێیا خوە گوهۆڕم
*
من تۆ د رووباریدا دیتى
لێ نزانم کانێ رووبار چەند یێ کوورە
*
هەمى رازێن من ل سەر ماسێ بەلینە
وەدیارە کو هەڤاڵێن.. ئێڤەلینە
*
ئەز بەحسى عەشقا خوە ناکەم
لێ خەلک دێمێ تە دپەیڤێن مندا دبینیت
*
نەبە هەڤسارێ رۆژگارێ
لێ سوار بە ل دویف رۆژگارێ