سێکس و ئەڤینى

سیلاڤ... کچەکا سنێلەیا کورد، ل باژێرکەکێ کوردستانێ دبیتە جهێ سەرنجراکێشانا هەموو گەنجێن هەڤژى یێن وێ و زەلامێن دەردۆرا وێ. جوانى و کەنیا وێ هند جوان و سەرنجراکێشە، کو دبیتە خەونا پڕانى یا گەنجان. لێ دبازارەکا مژەویدا، ب زۆرى ددەنە زەلامەکێ تەمەت بابێ وێ (حەمەى زێڕنگر)، پشتى دەمەکى ژێ دهێتە بەردان. پاشى شوو ب گەنجەکێ هەڤژیێ خوە دکەت، لێ بەرئاتاڤى کۆمەکا هەڤڕکى یێن دەروونى و نەخۆشى یێن ژیارێ دبیت، چونکو مێرێ وێ کەسەکێ لاواز و نێربازە، خەسوویا وێ گەوادیێ بۆ بووکێن خوە دکەت و هەموو بنەمالا خەسوویا وێ، ب ڤێ ژیانێ درازینە (ژبلى سیلاڤێ). مێرێ خوە قاییل دکەت کو ب هەڤڕا بچنە ژدەرڤەى وەلاتى. ل وەلاتەکێ ئورۆپى، یەک ژ عاشقێن وێ یێن گەنجاتیێ (کو نهۆ ب ژن و زارۆکە)، لێ ب خودان دەردکەڤیت و جوانترین چیرۆکا ئەڤینیێ دگەل هەڤ دبۆرینن. پاشى سیلاڤ حەز دکەت کو هەر ئێک ژوان هەڤژینى یا خوە ب دوماهى بینیت و ئەو هەروو پێکڤە خێزانەکا نوو دانن. لێ عاشقێ وێ دەستبەردارى هەڤژین و زارۆکێن خوە نابیت و ژێکڤە دبن. ئەڤجا سیلاڤ دکەڤیتە بن فەرمانێن مێرێ خوەیێ (قوندەھ) و دەرمانڤەخۆر، کو گەوادیێ بۆ دکەت و هەر شەڤ هندەک هەڤالان دئینتە مال، داکو سیلاڤ دخزمەتا تێرکرنا خوەرسکێن وان یێن ئاژەلیدا بیت. ئەڤە بوو هێڤێنێ رۆمانا (سیلاڤ و مێرێن وێ: تە ئەز فێرى ئەڤینێ کرم)*.

سڤێتلانا... کچەکا رۆس، ل شەڤەکا سەرێ سالێ دهێتە ئیغتصابکرن و زارۆکەک ب ناڤێ سڤێتلانا دبیت. سڤێتلانا ژى، ل ژیێ شازدە سالیێ دهێتە ئیغتصابکرن. پاشى ل کەمپەکا وەلاتێ ئەلمانیا، هەڤبەندییەکا ئەڤینیێ دگەل کورەکێ دروست دکەت و کورەک ژێ دبیت. لێ هەڤژینێ وێ گەلەک پویتە پێ نادەت و کورێ خوە و خانى ژێ دستینیت و بەرددەتە کولانا. دکەفتە درێکا کوردەکێ برسیێ سێکسیدا و دبیتە هەڤالا وى. هەرچەندە کور گەلەک حەز ژێ دکەت، لێ ئەو ژبەر هاریکارى یێن وى، پێڤە دهێتە گرێدان و سێکسى دگەل دکەت. دەمێ هەڤالێ وێ یێ دووێ ژى، تەرکا وێ دکەت، بەرەڤ ئەوێ کوردڤە دزڤریت و پشتى ڤەگەراندنا خانى و کورێ خوە، ژ دل حەز ژێ دکەت. دەمێ ئەو ژ کورێ کورد داخواز دکەت کو خێزانەکێ پێک بینن، ئەوێ کورد دەستبەردارى خێزان و زارۆکێن خوە نابیت و ژێکڤە دبن. ئەڤە ژى پوختەیا رۆمانا (سڤێتلانا)* یێ بوو.

سێکس و ئەڤینى

بابەتێ سەرەکیێ ڤان هەردوو رۆمانان، سەرەدەریێ دگەل بابەتێن سێکسى و ئەڤینیێ دکەت. پڕانى یا زانایێن سێکسولۆژیێ، بابەتێ کریارا سێکسى یا مرۆڤان ب ئەڤینیێڤە گرێددەن. هەتاکو مرۆڤى هەست و سۆز بۆ توخمێ بەرانبەر نەبن، نەشێت ب رەفتارەکا مرۆڤانە کریارا سێکسى ل گەل بکەت. لەوا د رەفتارێن رۆژانەیێن ب تۆرەدا، دەمێ ئەخوازا سێکسى ژ کەسەکى دهێتە، ب ناڤێ ئەڤینیێ ژێ دهێتە کرن. لێ چونکو د جڤاکێ کوردى یێ موسلماندا، نابیت چ کریارێن سێکسى ژدەرڤەى چوارچۆڤێ گرێبەستەکا جڤاکى بهێنە کرن (هەڤژینى)، لەوا ئەڤینى و هەڤژینى و سێکسى تێکهەل دکەن. دەمێ کورەک دهێتە ژنان و پێویستى ب ئەنجامدانا کریارا سێکسى هەبیت، دێ کەنە دناڤ قەفەسکا هەڤژینیێدا، ب وێ هیڤیێ کو دگەل وەختى دێ هەست ب بەرپرسیاریێ کەن و دێ بنە ژن و مێر. دەمێ کچەک دبێژتە دایبابێن خوە، ئەز حەز ژ هەڤژینێ خوە ناکەم، دێ بێژنێ دگەل وەختى و ئەنجامدانا کریارێن سێکسى و ئینانا زارۆکان دێ حەز ژ ئێکو دوو کەن.... هتد.

دەمێ زەلام یان ژن دگەل کریارا سێکسى رادهێت و نەمینیت ئەو دەهبەیێ ب ترس و حەرامکرى، دێ پێدڤى ب ئەڤینیێ بیت، ئەڤینییەک کو هەموو گیانێ بۆ باخڤیت. ئەڤە جۆرێ ئەڤینیێ بێ پلان و بێ ژڤان دهێت. ئەگەر ئەم ئەڤینیێ و هەڤژینیێ ب دل و مەژیڤە (دلینى و هزر) گرێدەین، دێ شێین بێژین کو ئەڤینى دل و دلینییە، لێ هەڤژینى مەژ و هزرە. دکریارا هەڤژینیێدا، هندەک ژ هەست و هزر و هیڤى و پلان و مال و دیتنێن خوە دگەل هەست و هزر و هیڤى و دیتنێن لایەنەکێ دى هەڤپشک دکەت و پێکڤە پرۆژەیەکى دادمەزرینن، فێ پرۆژەى وەکو هەر پرۆژەیەکێ دى یێ دنیایى گرێبەست و شاهد و ئاهەنگا ئیمزاکرنا گرێبەستێ هەیە، ئوو داکو میناکێ وێ یێ جڤاکى کاملان ببیت، موبارەکا ئایینى ژى دهاڤێنە سەر. هەر پرۆژەیەکێ هەڤپشکاتیێ، پێدڤى ب رێزگرتن و ل بەرچاڤ وەرگرتنا بۆچوونێن بەرانبەر هەیە کو ل داویێ دبیتە ئولفەتەک ژ رەنگێ سەربۆرێن پێکڤەژیانێ و هەڤتەمامکرنێ. ئەڤ پرۆسەیە ب مەژ و هزرێڤە هەڤبەندە، ئەگەر پرۆژەى سەرگرت، دێ خورتتر لێ کەت ژبۆ پاراستنا بەرژەوەندییەکا پتر کو پەروەردەکرنا زارۆکانە و وەرگرتنا پایەیەکێ هەژییە دجڤاکیدا. ئەگەر سەر نەگرت، هەڤژین دێ کەڤنە سەر دوڕییانەکێ: یان دێ هێلیت و بۆ خوە ل پرۆژەیەکێ دى یێ ژیان و پێکڤەژیانێ گەریێت. یان ژى دێ پارێزگاریێ ل سەر دەستکەفتان کەت، وەکو هەژیتى یا جڤاکى، ئاستێ خۆشگوزەرانیێ و ب خودانکرنا زارۆکان... هتد. دهەردوو حالەتاندا، ژیان دێ یا سروشتى بیت، لێ ب سەمتەکا دى.

لێ دحالەتێ ئەڤینیێدا، پەر بۆ مرۆڤى پەیدا دبن و ژ هەموو دەردۆرێن خوە ڤەدقەتیێت و بەرەف ئاسمانەکێ مشت هیڤى و خۆشى و خوداڤەندێن شینبوونێ و خۆشیێ و ژیاندنێڤە دچیت. مرۆڤ د ئەڤینیێدا مینا سەرخۆشەکییە و ئاگەھ ژ دەردۆران نینە. مرۆڤێ ئەڤیندار، هەموو تشتێن هەڤبەند ب دلبەرێڤە جوان دبینیت، هەروەکو شاعرەکى گۆتى (خوە ئەز حەز ژ درەوێن تە ژى دکەم). ئەڤە گرێدایى دل و دلینیێیە، چ تشت و بەرنامەیێن پلانرێژکرى نامیننە ل بیرا مرۆڤى، تنێ چاڤ و دیتنا دلدارى/ دلبەرێ نەبن. د ڤێ ئەڤینى یا پوخت و بێگەرد دا، نەمەرجە کو مرۆڤ بگەهتە ئێک و خێزانەکێ پێک بینیت، لێ مەرجە کو مرۆڤ قەتا خوە یا دى دهەبوونا وێدا/ ویدا ببینیت. ئەڤینى کاملانبوونا گیانیێ مرۆڤییە و ل کوپیتکا خۆشیێ دژیت و هەست دکەت کو مرۆڤەکێ کاملان و گرنگە د هەبوونێدا. ئەگەر ب دۆماهى هات، دێ بیتە داخەکا نەسارێژ بوویى و هەتاهەتایێ دگەل مرۆڤى دژیت. دبیت ژبەر ڤێ چەندێ بیت، کو چ جاران ئەڤینى یا ئێکێ ژبیرا مرۆڤى ناچیت، داخەکە دکووراتى یا دلیدا دمینیت و جارجارە دهێتە سەر روویێ بیردانکێ. ئەڤ جۆرێ ئەڤینیێ بوو، سیلاڤێ ب کەنى و ب ئاورێن خوە بەردایە ددلێ هەواریدا. لێ هەوار یێ ب دوتماما خوەڤە گرێدایى بوو، نەچار بوو مارەکەت و خێزانەکێ پێک بینیت. ل وى دەمێ زانى کو سیلاڤ ب مێرڤە یا چوویە ئەلمانیا، ئێکسەر وى ژى کارێ خوە کر و بەر ب ئورۆپاڤە دا ڕێ. نە ژبەر هندێ کو ژڤانەک دابوونە ئێک، ئوو هەر سیلاڤێ چ ئاگەه ژڤێ ئەڤینا وى یا دژوار نەبوو. لێ تنێ ژبۆ هندێ کو ل بن ئاسمانەکى بژیت، هەست دکەت سیلاڤ ژى یا ل بن. بەلا خوە ژێڤە ناکەت، هەتاکو سیلاڤ ژى ب هارى حەز ژێ دکەت و وەکو تەمامکەرێ گیانیێ خوە دبینیت.

ب هەمان شێوەیێ پەهلەوانێ رۆمانا (سیلاڤ و مێرێن وێ)، ئازاد د دیتنا ئێکێدا دکەڤتە دداڤێن ئەڤینى یا سڤێتلانایێدا و ل دویف دگەریێت هەتاکو سڤێتلانا ژى دکەڤتە دناڤ داڤێن ئێکەمین ئەڤینى یا راستەقینەدا. دحالەتێ ئێکێدا ئەڤینییەکا ئێکلایەنى یا هەلگرتى بوو دکووراتى یا دلیدا، دحالەتێ دووێدا هەستەکا خودایى بوو ژئاسمانان بۆ هات. ئوو چونکو ئەڤە ئەڤینى یا راستەقینە بوو، دهەردوو حالەتاندا پێدڤى ب دویفچوون و سنج و رەوشت و بنەمالا وان نەهاتە کرن. ئانکو ئەم دشێین بێژین، کو مرۆڤ هەڤژینیێ پێک دئینیت دا جڤاکى ژخوە رازیکەت و د چاڤێن جڤاکیدا هەژى بیت. لێ دحالەتێ ئەڤینیێدا، مرۆڤ چ پویتەى ب جڤاکى ناکەت و خودانێ خوە و دلێ خوەیە. خالا هەڤپشک دناڤبەرا هەردوو دلبەراندا، ئارێشەیێن جڤاکى، پشتگوه هاڤێتن و پێدڤى یا ب هەڤالینییەکا دلسۆز و هەڤسۆز.

سێکس و قەحبەتى

سێکس کریارەکا غەریزەیى- جانەوەرییە، دگەل بوونا هەر جانەوەرەکى دبیت و ئەگەرێ مانا جانەوەرانە (مرۆڤ و ئاژەل و رووەک). ل دەف مرۆڤان، سێکس کریارەکا بایولۆژى- مرۆڤایەتى و جڤاکى یا دوولایەنییە (غەریزە یێن هەردوو لایەنان پێ تێر دبن). هەست و سۆز و ئەڤیندارى دگەل هەیە و دوو مەرەمێن سەرەکى ب جھ دئینیت: بەردەوامى یا ژیانێ و خۆشى یا ژیانێ (کو تێرکرنا غەریزەیەکا سەرەکى یا مرۆڤییە). قەحبەتى؛ کریارەکا بایولۆژى- نەجڤاکییە، مەرەمەکا سەرەکى هەیە، ئەو ژى تێرکرنا غەریزەیا سێکسییە، بێى هەبوونا هیچ هەست و سۆزەکا مرۆڤایەتى. سیمایەکێ بازرگانى یا ب لەشى ب خۆڤە دگریت. زەلام یان ژن، لەشێ خوە دفرۆشیتە لایەنەکێ بەرانبەر ژبۆ تێرکرنا غەریزەیا سێکسى یا بکڕى. چ هەست و سۆز و ئەڤیندارى دگەل نینە، تنێ رازیکرنا یێ بەرانبەرە ژبۆ پاراستنا بەرژەوەندەکا دیارکرى. دهەموو جڤاکان و دهەموو سەردەماندا، کریارەکا نەجڤاکییە و خەلک ب چاڤەکێ کێمبها سەرەدەریێ دگەل دکەت. ل جڤاکێن ئۆلدار وەکو ئۆلێ ئیسلامێ، دهێنە رەجماندن و کوشتن. ب ڤێ چەندێ ژى، ئەم دکارین بێژین کو لەشفرۆشى (قەحبەتى)؛ کەڤنترین پیشەیێ نەهەژى یێ جڤاکێن مرۆڤایەتیێیە، کو ژن یان زەلام لەشێ خوە و شیانێن خوەیێن تێرکرنا غەریزەیا سێکسى دئێختە بەربازارپێکرنێ، نرخەکێ دیارکرى یان ب جهئینانا داخوازەکێ ژبۆ ئەنجامدانا کریارا سێکسى دادنیت. هەر کەسەکێ بکاریت وى نرخى دابین بکەت یان وێ داخوازێ ب جهبینیت، دێ لەش بۆ وى/ وێ هێتە پێشکێشکرن.

گەلەک ژ جڤاکناس و ڤەکۆلەرێن مرۆڤایەتیێ، دبێژن کو دبنەرەتدا کەسەک حەز ناکەت ڤێ بازارێ ب لەشێ خوە بکەت، لێ ژنەچارى یا ژیارێ و هندەک جاران دبن هێز و دەستەلاتا بازرگانێن سێکسى دهێتە ئەنجامدان. ئەگەر خوە داهێلنە دناڤ کووراتى یا هەر لەشفرۆشەکێدا، دێ بینین کو هەر ئێکێ کۆمەکا کێشە و ئاستەنگێن جڤاکى هەنە و ب نەچارى هاتینە پاڵدان کو کەفتینە د کوورا لەشفرۆشیێدا. ل وەلاتێن پێشکەفتى و ئەوێن دکارن ب ئازادى بەحسى هەموو تشتێن هەڤبەند ب ژیانێڤە بکەن، جهێن تایبەت بۆ لەشفرۆشیێ داناینە و وەکو پیشەیەکى (هەرچەندە نەهەژییە) لێ دنێرن. ب ڤێ چەندێ ژى، نەدوورە ژن یان زەلام بۆ ماوەیەکێ دیارکرى ڤى کارى بکەت و پاشى ڤەگەریتەڤە سەر ژیانا خوە یا سروشتى و ب شێوەیەکێ چالاک بکەڤیتە دناڤ جڤاکیدا و نەدوورە کۆمەکا کریارێن هەژى رێزگرتن و شەهنازى پێکرنێ ژبۆ وەلات و جڤاکێ خوە پێشکێشکەت. لێ ل وەلاتێن ئیسلامى، بەحسکرنا ڤێ کریارێ ژى قەدەغەیە و هەر کەسەکێ بهێتە گرتن، دێ بەرئاتاڤى سزا یێن یاسایى بیت. ئەڤجا کریارا لەشفرۆشیێ ل وەلاتێن بیانى (ئەوێن ئەم دبێژینێ بێ سنج) ل جهەکێ دەستنیشانکرى هەیە و مالێن دى ژێ دپاراستینە. لێ دجڤاکێن مەدا قەدەغەیە و چ جهێن دەستنیشانکرى بۆ نینن، لەوا ئەو کریارە دناڤ هەموو گەرەکاندا هەیە و خەلک نەشێت ژێکجودا کەت، دپڕانى یا جاراندا کەسێن جڤاکپەروەر (دیندار) و لەشفرۆش تێکهەل دبن و نەدوورە دهەمان گەرەکێدا بژین یان ل هەمان جهێ کارى کار بکەن.

دبیت کەسەک پرسیار بکەت، ئەرێ ما هەڤژینى یا ب زۆرى، یان دانەشوویا ل بەرانبەرى نەخت و داخوازى یێن زۆر (ب تایبەتى کو ژن و زەلام حەز ژ هەڤ ناکەن)، ما ناکەڤتە دخانا لەشفرۆشیێدا؟ ژروویێ جڤاکیڤە، کریارا هەڤژینیێ چەوا بیت و ب چ شێواز هاتبیتە ئەنجامدان و ل بەرانبەرى چ بیت، کریارەکا قەبوولکرى یا جڤاکییە و خەلک ب شێوەیەکێ سروشتى سەرەدەریێ دگەل دکەت، ئەگەر خەلک رەوشا وێ بزانن ژى، دێ هەڤسۆزى و دلپێڤەمانێ بۆ پێشکێشکەن. لێ لەشفرۆشى نەیا قەبوولکرییە و خەلک ب شێوەیەکێ سروشتى (یان ب رێزگرتن)، سەرەدەریێ دگەل ناکەت، هەروەسا لەشفرۆش ب خوە ژى هەست ب ڤێ چەندێ دکەن و هەستەکا خوەکێمدیتنێ ل دەف هەیە. نوکتەیەکا عیراقى هەیە: "دبێژن جارەکێ کابرایەکێ قەحبەچى ل تەکسییەکێ یێ سوار بوو، ل جهەکى دوو ژنان دەستێ خوە بۆ بلند کر کو وان ژى هەلگریت، لێ ئەو کەسێ تێدا دبێژتە شۆفێرى وان نەهلگرە، ئەز دێ پارێن وان ژى دەم. شۆفێر ژى بۆ نەراوەستیا، ل دەمێ پارەدانێ شۆفێرى پرسیار کر کا بۆچى وە کر؟ گۆت: کارێ من قەحبەچیاتییە و ئەو هەردوو ژن، ژ بنەمالەکا رێزدار و شەریفن، ئەگەر خەلک مە پێکڤە ببینیت دیەک ترومبێلێدا، دبیت هزرەکا خراب ژ وان ژى بکەن". هەرچەندە ئەڤ نوکتەیە وەکو هەڤتەریبییەکا هەڤدژ ژبۆ جوامێرى یا ئەوێ قەحبەچى ئینایە، لێ رامانا ل پشت وێ ئەوە کو کەسێ قەحبەچى ژى دزانیت یێ کارەکێ بێرێز و نەهەژى دکەت (هەستا خوەکێمدیتنێ).

ئەڤ موفارەقەیێن دناڤبەرا لەشفرۆشان و کەسێن ئۆلدارێن بازرگانیێ ب ئایینى و ژیارا خەلکى دکەن، مشتى ناڤ جڤاکێن ئیسلامێن، ئەو کەسا لەشفرۆشا بێرێز دناڤ جڤاکیدا، دبیتە سەدەمێ پاراستنا ژیانا کۆمەکا خێزانان و کۆمەکا هەژارێن جڤاکى خواندنێن خوە ب پارێن لەشفرۆشیێ تەمامکرینە. ل بەرانبەر ژى کۆمەکا کەسانێن رێزدارێن جڤاکى بووینە ئەگەرێ هەلوەشیانا ژیانا کۆمەکا خێزانان و کۆمەکا قوتابى یێن زیرەک ژئەگەرێ چالاکى یێن نەیاسایى دەربەدەر بووینە و خواندنێن خوە تەڤاڤ نەکرینە. ژلایەکێ دیڤە ژى، سەرەدەریکرنا دووانیزمى یا کەسانێن پێگیر و جڤاکپەروەر دگەل ڤى بابەتى مشتى کتێبێن جڤاکناسیێ و رۆمانێن نڤیسەرانن. ئەگەر ئەم ب ناڤ ڤى بابەتێ دووانیزمى یا کەسایەتیێ و جوداهى یا دناڤبەرا قەحبەتى یا سیاسى و قەحبەتى یا جڤاکیدا بچین، دێ بابەتێ مە بەر ب سەمتەکا دى یا کوورتر و دوورترڤە چیت.

کریارا قەبوولکرى یا سێکسى، ئەوە یا دچوارچۆڤێ خێزانێدا دهێتە کرن (چ ب دلمراز بیت، یان ژنەدل بیت). هەر کریارەکا ژدەرڤەى ڤى چوارڤەى (ب تایبەتى نێر)، دئێخنە د بازنەیێ قەحبەتیێ و لەشفرۆشیێدا. ئوو ل گورەى پێناسەیا لەشفرۆشیێ، نرخێ کریارێ مەرجەکێ سەرەکییە و هەمەجۆرى یا کەسان ژى تێدا سروشتییە. لێ دێ چ بێژنە وى سێکسێ دکریارەکا ئەڤینداریێدا دهێتە کرن (نەمازە ئەگەر هەردوو لایەن خودان خێزان بن)، ژلایەکیڤە چ نرخ و بەرژەوەندى یێن دیارکرى یێن مەرجدار تێدا نینن (ژبلى هەست و سۆزێن مرۆڤایەتیێ). ژلایەکێ دیڤە ژى، چ کەسێن دى هەڤپشکى وان نابن، تنێ دوو ئەڤیندارن و یێ دەربرینێ ژ حەز و پێدڤى یێن خوەیێن سروشتى دکەن؟! مشە جاران، ژبەر ڤێ ئەڤینداریێ پەیوەندى یا هەردوو ئەڤینداران دگەل هەڤژینێن وان ژى سار دبیت، چونکو هەست و سۆزەکا گەرمتر ژ دەرڤە دبینن. هەلبەت ئەگەر ناڤێ لەشفرۆشیێ نەدانینە سەر ژى، دێ ب خیانەتێ هێنە گونەهبارکرن. چونکو د گرێبەستا جڤاکى یا قەبوولکریدا، هەردوو ب شێوەیەکێ راستەوخۆ یان نەراستەوخۆ سۆزێ ددەن کو ب ئولفەت و رێزگرتن و ئەداکرنا رۆڵێن جێندەرى یا جڤاکى، پارێزگارى یا پرۆژەیێ هەڤژینیێ کەن. لەوا ئەم دکارین ڤێ کریارێ ب خیانەتا هەڤژینیێ بدەینە نیاسین. لێ پرسیار ئەوە، ئەرێ یەک لایەن دێ بیتە پارێزگار یان فەرە هەردوو لایەن ب ئەرکێ پاراستنا هەڤژینیێ راببن؟ ئەرێ حەلالە زەلام خیانەتێ بکەت و ژن پارێزگاریێ بکەت؟ ئەرێ راستە هێزا سێکسى یا زەلامى ژ یا ژنێ پترە؟ ئوو گەلەک پرسیارێن دى یێن جڤاک چاڤێن خوە لێ دنقینیت، کەفتینە بەر رەخنەگرتنا نڤیسەرێ ڤان هەردوو رۆمانان.

زێدەبارى ڤان پرسیار و ئازراندنێن زەقێن سەرسۆرهێنەر و سەتمینچێکەر، کو دێ جڤاکى ئێختە دبازنەیێ دانوستاندنەکا ڤالا یا بێ بەسڤدا، نڤیسەرى خوە ل دوو بابەتێن دى یێن نەقەبوولکرى دایە. درۆمانا سڤێتلانایێدا، ئاماژە ب کریارەکا ئەنسیستێ (سێکسێ دگەل مەحرەمان- زنا المحارم) ددەت، کو پەهلەوانا رۆمانێ هەڤبەندییەکا سێکسى دگەل خەزوورێ خوە هەیە. هەلبەت ئەڤە ئێکە ژ کەبائیران، جڤاک ب چ تەرزان قەبوول ناکەت و ل گورەى عورفێن جڤاکى و یاسایێ ژى فەرە بهێتە سزادان. ئەڤ بابەتە ژى وەکو هەموو بابەتێن دى یێن هەڤبەند ب ژیانا مرۆڤانڤە، دهەموو جڤاکاندا هەبوویە و هەیە، لێ جڤاکێن رۆژاڤایى شیاینە بێخنە بەر لێدان و رەخنەگرتنێن توند، یان ب کێمى ئازراندینە. دجڤاکێن کشتوکالى و دائێخستیدا، خوە ژێ دوور دکەن ژبەر باوەرنەکرنێ و ماندلاکرنا وێ ژلایێ دەروونیڤە. ئەڤ بابەتێن ژ کەبائیران، خەلک ب کێمى خوە لێددەت، چونکو نەتنێ خەلک باوەر ناکەت، بەلکو ئەو ب خوە ژى باوەر ناکەت. ئەڤجا دەمێ نڤیسەرەک ڤى بابەتى دئازرینیت، مەرەم پێ رەتکرنەکا توند و رەخنەگرتنە (نە پەسندانە). لێ جڤاکێن ئیسلامى، هەردەم ژ ڤان بابەتان دترسن، چونکو وەسا هزر دکەن دێ بیتە شێوازەکێ هاندان و پاڵدانێ. هەروەکو بابەتێ رەوشەنبیرى یا سێکسى، کو بابەتەکێ گرنگ و کاریگەرە ژ دژیانا هەموو سنێلە و گەنجاندا، لێ ئایین نەوێریت ب شێوەیەکێ گەلەنپەرى خوە لێ بدەت، یێ ئێخستییە دناڤ چوارچۆڤێ دیوارێ مزگەفتێدا و تنێ مەلاى ماف هەیە بەرسڤا پرسیارێن سێکسى یێن گەنجان بدەت. نەدوورە بەرسڤێن مەلاى ژى نەدروست بن، چونکو ئەو ب سەربۆرا خوە بەرسڤێ ددەت، نە ب زانینا خوە. ب دیتنا من ئەڤە ژ کێمباوەرى یا ئۆلداران ب مرید و باوەردارێن خوە هاتییە. دبیت یێ چەوت بم، لێ من هەتا نهۆ چ شرۆڤەکرنێن دى (ژبلى کێمباوەریێ) بۆ نەدیتینە.

بابەتێ دى یێ ئازراندى درۆمانا (سیلاڤ و مێرێن وێ)دا، نێربازى و گەوادى یا ژبۆ ئەندامێن بنەمالێیە. ئەڤ بابەتە ژى، وەکو ئەنسیستێ هەر هەبوویە و هەیە. لێ جڤاک ژبەر ماندلاکرنا دەروونى، باوەرناکەت و حەز ناکەت بهێتە ئازراندن. ئەگەر ل هندەک جهان یان ل دەف هندەک ئۆلداران بهێتە ئاشکراکرن ژى، دێ ب نهێنى سەرەدەریێ دگەل کەن، چونکو هەم ژلایێ ئایینى و هەم ژلایێ جڤاکیڤە ژى یێ نەحەباندییە، هەروەسا ژلایێ یاسایێڤە ژى سزایێن توند بۆ هەنە. ئەگەر ئەم سەحکەینە بابەتێ گەوادیێ کو خەسوویا سیلاڤێ ژبۆ بووکێن خوە دکەت، کێمبهاییەکا جڤاکى دایە هەموو بنەمالێ، هەموو خەلکێ شەریف خوە ژێ ددانە پاش و ئەوێن بکڕ ژى لێ مێڤان بوون، لێ هەکو ژ کارێ خوە خلاس دبوون، دیسا کەسەک خوە لێ ناکەتە خودان. سیلاڤ ب خوە ژى یا ب گومان بوو کو (چاوا تۆلازەکێ وەکى مراد ب بیژنەکا وەکو من رازى ببت؟... بپ١١٠). لێ چونکو کچەکا جوان و تۆلاز و لەکەدارە، هەم وان دەرا خوە دیت بخوازن، هەم بابێ وێ ژى رازى دبیت و سیلاڤ ژى ژبۆ قورتالبوونا خوە ژ زۆردارى یا باب و برا رازى دبیت. هەر خێزانەک ب سیستەمێ خوەیێ پەروەردەییڤە گرێدایە و دبیتە ئەگەرێ هندەک رەفتارێن دیارکرى یێن ئەندامێن وێ. نەدوورە ژى، رەفتارا ئەندامێن خێزانەکێ (ژبەر هەر ئەگەرەکێ هەبیت) ببیتە سەدەمێ هەلوەشیانا خێزانێ و کێمبهایى یا وێ دچاڤێن جڤاکیدا.

خالا دووێ د ڤێ رۆمانێدا، بابەتێ نێربازیێیە. ئەو ب خوە، نێربازى بۆ وان کەسان دهێتە گۆتن ئەوێن حەز ژ سێکسێ هەڤڕەگەزیێ دکەن، ئانکو ئەون یێن کریارا سێکسى دگەل هەڤرەگەزێن خوە ئەنجامددەن. دئینگلیزیێدا تێرمێ هومۆ (Homosexuality) ژبۆ هەر دووکەسان دهێت (ئەوێ دکەت و یێ ددەت)، دعەرەبیێدا ژى گەلەک تێرم هەنە، لێ لەواتى (لواطة- لوطي) ب شێوەیەکێ فەرمى و زانستى بۆ کریارا هەڤڕەگەزى یا سێکسى دهێتە بکارئینان. دکوردیێدا، نێربازى وەکو تێرمەکێ زانستى ژبۆ هەردوویان دهێتە بکارئینان، لێ دژیانا رۆژانە و ئاخفتنێدا؛ نێرباز بۆ لێگەرێ ل دویف سێکسێ کوران دهێتە بکارئینان، وەکو کوترباز و فێلباز... هتد، ئوو ژبۆ ئەوێ کریارا سێکسى دگەل دهێتە بکارئینان دبێژنێ قوندەھ. قوندەهى کێماسییەکا مەزنە دتێگەهێن جڤاکى و ئایینیدا ژى. لەوا کەسێ قوندەھ، دجڤاکیدا بێرێز و وولکرییە. ژ روویێ یاسایێڤە ژى هەردوو (نێرباز و قوندەھ) ب زیندانکرنێ دهێنە سزادان. دکوردەواریێدا، کەسێ قوندەھ ل دەستپێکێ ژلایێ بنەمالا خوە و خێزانا خوەڤە دهێتە رەتکرن و کێمبهاکرن، چونکو ل گورەى تێگەهشتنا جڤاکى (ئەگەر ئەم حەرامى یا ئایینى ژێ پاڤێینە دەر)، فەرە کەسێ نێر بکەر بیت و ئەگەر هەڤڕەگەزى یا سێکسى ژى بکەت، فەرە یێ نێرباز بیت (نەقوندەھ). ئەڤ بابەتە دبیتە سەدەمێ ڤاڕێبوونا خێزانێ و زارۆکان ژى. نڤیسەرى قوندەهى یا مێرێ سیلاڤێ کرییە ئەگەرەکێ سەرەکى کو سیلاڤ ل زەلامەکێ راستەقینە بگەریێت و وەکو مرۆڤەکا نۆرمال سەرەدەریێ دگەل بکەت.

ب ڤان بابەتان: هەڤژینى دجڤاکێ کوردیدا، سێکس و ئەڤینى، سێکس و قەحبەتى، سێکسێ دگەل مەحرەمان، نێربازى و گەوادى، ئوو کۆمەکا تێگەهێن دى یێن جڤاکێ کوردى و ئورۆپى، نڤیسەر ناڤەرۆکا ڤان هەردوو رۆمانێن بەردەست پێشکێشى خواندەڤانێن خوە دکەت. داکو خواندەڤانێ ڤێ رەخنەیا تێخواندنى (الاستقراء) و هندەک جاران تێدەراندنێ (الاستنباط)، بکاریت ب شێوەیەکێ کاریگەر د بۆیەرێن هەردوو رۆمانان بگەهیت، دێ تبابەکێ ل سەر بۆیەرێن هەردوو رۆمانان راوەستین:  

١. سیلاڤ و مێرێن وێ: تە ئەز فێرى ئەڤینێ کرم:

ژناڤى دیارە کو سیلاڤێ پتر ژ مێرەکى کرینە، لێ تایتلێ لاوەکى وێ ئاماژێ ددەت کو ئەڤیندارا چ مێرێن خوە نەبوویە، تنێ ل موغامەرەیا داویێ فێرى ئەڤینێ دبیت. ئانکو نڤیسەرى دڤێن پەیامەکێ بگەهینتە خواندەڤانى و بێژیت، تنێ ئەڤینى یا راستەقینە ئەڤینە، هەموو پەیوەندى یێن دى درەون.

سیلاڤ ل مالبابا خوە ئازاد و مشت هیڤى بوو، لێ رۆژەکێ: "لێڤێن من دناڤ لێڤێن وى دا بوون، ئەز ل بەر پەڕێن ئاسمانان دفڕیم.. من هەست ب پێژنا برایێ خوە کر. من هند دیت ، پرچا من دناڤ دەستێن ویدایە. ئەز ب پرچێ راکێشام، بەر ب مالڤە برن... بپ٤١". ئەڤ ئەڤینى یا وێ یا ئێکێ دگەل کورەکێ هەڤسوویێ وان، سەرێ داڤا هەموو ئارێشێن دى یێن سنسلەییە. دکوردەواریێدا، هەردەم باب و برا هەولددەن کو کچا خوە نەدەنە وى کەسێ ڤیاى و ئاشکرا بووى. ئەڤە ژى هیجەتەکا ب هێز بوو کو برایێ وێ بدەتە کەسەکێ هندى بابێ وێ (ژبەر مال و ملکەتێ وى). سیلاڤ ب نەچارى رازى دبیت: "ئەز ل هیڤى یا سەربڕینێ بووم... پشتى دەمەکێ کێم، دگەل حەمەیێ زێنگر و مەلایێ تاخێ مە و دوو زەلامێن دى هاتنە ژوور... بپ٤٣". ب ڤێ چەندێ سیلاڤ دبیتە هەڤژینا کەسەکێ هندى بابێ خوە، کو چەندین ژن بەرى وێ بەرداینە. دگەل ڤى مێرى، تۆشى ئێکەمین ترۆمایا دەروونى دبیت، پشتى حەمەیێ زێڕنگر نەشیاى وێ بکەتە ژن: "ئەز دەرناکەڤم، هەتا نەبمە زاڤا، ئەڤێ باش بزانە، دێ چ بێژمە هەڤالان؟! ئەز نە ژ نوو تولازم! تو نەکچا ئێکێیى ئەز دکمە ژن... تلا خوە یا شەهدێ کرە ددەڤێ خوەدا، تژى سەر تف کر، ب هەموو هێزا خوە، کرە دنیڤا متایێ وێرا. قێرییێن وێ، گوهێ برازاڤایى کونکرن. تژى سەر پاتێ کچینیا وێ خوین بوو... بپ٩٢-٩٣". پاشى هەموو کریارێن وێ یێن سێکسى دگەل مێرێ وێ یێ حەلال مینا ئیغتصابکرنێ بوون: "نەدهێلا ئەز جلکێن خوە ژبەر خوە بکم، دبەر مندا ددڕاندن. دگۆت: ئەڤە ژى خۆشییەکە... بپ٩٧". هەروەسا دەمێ ڤیاى ژپشتڤە بچیتە دەف و نەهێلاى، ب تەعدایى یا ئیغتصابکرنێ دگەل کر: "دیسان دەستێن من ب لێڤا تەختیڤە گرێدان و پییێن من ژى وەک وى ڤیایى، ب بنێ تەختیڤە گرێدان... کەماخێن من ب وان دەستێن زڤر پەرخاندن، ب هەموو هێزا خوە، ئەز کێشامە دکۆشا خوەدا... بپ٩٩-١٠٠". ئەڤ ترۆمایێن بەردەوام و یەک ل دویف یەک، ئێخستە دقەیرانەکا دەروونى یا نالەباردا. ئوو دەمێ مێرێ وێ ژێ تێر دبیت، بەرددەت، لێ د کریارا بەردانێدا ژى (کو رزگاربوونەکە)، تۆشى ترۆمایەکا دى یا دەروونى دکەت: "من دەست هاڤێتە دەرپێکورتکێ خوە، دا بکمە بەر خوە، ژ دەست من ئینا دەر و گۆت: ئەڤە من بۆ تە کرییە، نابت تۆ ببى... ئەز ب تەنکا کراسى و بێ دەرپێ ژ مالا وى دەرکەتم... بپ١٠٤". ژ ڤێ رەوشا دەروونى یا هەلوەشیایى، بەرەف گازندە یێن باب و برایێ خوەڤە دچیت. ئەو پێدڤى هاریکارى یا بنەمالا خوە بوو، کو پشتەڤانى یا وێ بکەن. لێ باب و برا ژ ئەگەرێ ژدەستدانا زاڤایەکێ دەولەمەند، ئەو سووچبار دکر و گازندە ژێ دکرن و دماڵڤە زیندانکر. هەتاکو خوازگینى بۆ هاتین، بێى بزانیت کییە و چییە، رەزامەند دبیت (ب نەمازەیى نە پیرەمێرە). ژلایەکیڤە دڤیا ژ زۆلما باب و برا و زیندانکرنا دناڤ مالێدا رزگار ببیت: "دمالا بابێ خوەدا، ئەز بوومە پیڤازەکا گەنى. کەسێ پووتە ب من نەدکر. ب شەڤ و رۆژ، وەک گرتیا دژوورا خوەدا... بپ١٠٧". ژلایەکێ دیڤە ژى، گەنجەکێ هەڤژیێ وێیە و دبێژن لاوە و خویندەوارە ژى. لێ هەر یا دوودل و ب گومان بوو: "چاوا تۆلازەکێ وەک مراد دێ ب بیژنەکا وەک رازى بیت؟ من هەر دگۆتە دایکا خوە، دڤێت هوون راستیا من ببێژنێ دا پەشێمان نەبت. دایکا من دگۆت، ئەو هەموو تشتان دزانن... من نەدزانى ل ناڤ مرۆڤێن وى کەس پێ رازى نابت، کەسێ نەڤێت کچا خوە بکتە د جوبەخانەیێدا... بپ١١٠-١١١".

ل مالا مێرێ دووێ، سیلاڤ تۆشى دوو سەتمینێن دژوار دبیت، یا ئێکێ خەسوویا وێ گەوادیێ بۆ بووکێن خوە دکەت و ب پارە ددەتە شۆلى. پشتى مێرێ خوە پێ ئاگەهدار دکەت و چ پووتە ب گازندا وێ نەهاتییە کرن، دویفچوونا مێرێ خوە دکەت، بۆ ئاشکرا دبیت کو ئەو ب خوە ژى مرۆڤەکێ پووچە و دوورە ژ زەلامینیێ (قوندەهە). دحالەتێن هۆشادا، مالبابا کچێ دهێنە دناڤ ئارێشەیێدا و چارەسەر دکەن، ئەگەر نە ژبەر خاترا کچێ بیت، ژبەر خاترا سومعەتا بنەمالێ ب خوەیە. برایێ خوە ئاگەهدار دکەت، لێ برایێ وێ ژى ژلایێ خەسوویێڤە دهێتە کڕین: "ئەز نزانم چ بۆ گۆت.. لێ یا ئەز باش دزانم، وێ شەڤێ هەتا سپێدەیێ دوو ژن ل مالا خەسوویا من، دبەر تەنشتا برایێ مندا نڤستن... بپ٦٨". پشتى ڤى بۆیەرى، براى ژى پشتا خوە دایێ و ل دژى بەردانا وێ راوەستیا، جارەکێ دبێژتێ: "ما دێ هەر رۆژ ب بەردانا تەڤە بم. دوهى بوو، تە خوە ژمێرەکى دایە بەردان. ڤێ سوحبەتێ نەکى... بپ٧٠". ئەڤجا دوو رێک کەفتنە بەرانبەر سیلاڤێ یان دگەل خەسوویا خوە کار بکەت، یان ژى برەڤیت. لێ ئەگەر برەڤیت، هەم مالا مێرێ و هەم مالبابا وێ ژى، دێ ب دویف کوشتنا وێڤە بن و وەکو بێنامووسەک دێ هێتە کوشتن (نە وەکو رەڤین ژ بێنامووسیێ). ئەڤە ژى ئێک ژ عورفێن جڤاکى یێن نەدادپەروەرە دگەل ژنێ دهێتە کرن. مشە جاران، مالباب هەست ب بێگونەهى یا کچا خوە دکەت و دبیت بزانیت کو بێگونەهە، لێ ژبەر گۆتنێن خەلکى و لۆمەکرنا دنیایێ دهێتە کوشتن. نەدوورە ب دەهان یان سەدان کچ و ژنێن بێگونەه ژبەر گۆتگۆتکێن خەلکى هاتینە بنئاخکرن. لێ ئەگەر بشێت دگەل مێرێ خوە برەڤیت، هینگى دێ یا قەبوولکرى بیت ژلایێ جڤاکیڤە. ئەڤ هزرا هەڤسوویەکێ وێ بۆ گۆتى، چوو دسەرى را و مێرێ خوە قاییلکر کو بچنە ئورۆپا: "ئەڤ بڕیارە دێ من ژ خوەکوژتنێ رزگار بکت. ژبەرکو ئەز چو جاران هزرا خوە فرۆتنێ ناکم. بەردان ژى نەما، تنێ ل پێشیا من خوەکوژتنە یان ئەڤ بڕیارەیە... بپ٧٢". هەموو هیڤى یا وێ ئەو بوو کو ژ وێ مالێ دوور بکەڤیت.

د رەوشەکا نەجڤاکى یا بارکرى ب خیانەتێ، خیانەتا هەڤالى و مێڤانداریێ و عورفێن کوردەواریێدا، هەوار ل مالا سیلاڤێ داخوازا ئەڤینیێ ێ دکەت. سیلاڤا ترۆمادار و ترسیایى ژ هەموو زەلامان، وى رەت دکەت: "من گۆت ئەڤێ رەوشەنبیر و ئاخفتن خوەش، ئەوێ من هزرەکا مەزن بۆ دکر، ئەو ژى ئێخسیرێ بنێ خوەیە، ئەو ژى نێرە... بپ٨٤". لێ دگەل هەولدانێن بەردەوام و پێدڤى یا سیلاڤێ ب هەڤالەکێ باوەرپێکرى کو دلێ خوە بۆ ڤەکەت و هندەک ژ خەمێن خوە ب دلدەرێژکرنێ ڤەرەڤینیت. دبیتە هەڤالا هەوارى، نەمازە پشتى زانى کو نڤیسەرە و دێ سەرهاتى یا وێ کەتە رۆمانەک کو ببیتە وانەیەک ژبۆ کچێن بەدبەختێن وەکو وێ و مالباتەکا نەزانا وەکو مالباتا وێ. لێ ئەو هەڤالینییە دبیتە ئەڤینى و پاشى دبیتە عەشقەکا راستەقینەیا دوو دلێن بریندار. دگەلەک لەقتەیێن رۆمانێدا، نڤیسەر ب رێکا دانوستاندنێن دناڤبەرا هەردوو عاشقاندا، ئاماژە ب وێ چەندێ ددەت کو سیلاڤ نە قەحبەیە، لێ ئەڤیندارەکە و یا مومارەسا مافەکێ خوەیێ مرۆڤانى دکەت:

-    ئەڤینى یا چ؟ پشتى سێ بچووک و دوو مێران؟... من ژى ژن و سێ بچووک هەنە./ گەلەک زەحمەتە./ گەلەک ساناهییە... بپ٢٠.

-    بەلا خوە ژمن ڤە بکە. ئەز هەست دکم، ئەز ئەگەرێ مالخرابکرنا تەمە... بپ٨٣.

-    باش بزانە تو مێرێ ئیکێیى ژبلى حەلالێن من، دەستێ خوە کرییە من... بپ٩٤.

-    ما بچووک و کار و مال و ژیان بۆ چنە؟ هەکەر مرۆڤى شەرەف نەبت... بپ١٧٠.

ب ڤان میناکان و گەلەک میناکێن دى یێن دەربراندى، سیلاڤ و هەوار هەردوو داکۆکیێ ل سەر پاقژى و ئەڤینى یا دناڤبەرا واندا دکەن. ئەو ئەڤینا ئەو هەردوو پێکڤە تەڤاڤکرین: "تو باوەر دکى ئەز ژدل حەز ژتە دکم؟ نەخێر، تو حەز ژمن ناکى. ئەم تەمامکەرێن ئێکن. ئەوا ژتە کێم، ئەز ددمە تە، ئەوا من دڤێت تو ددیە من. لەوما ئەم دشێن پێکڤە بژین... بپ٥٩". چونکو هەوارى ژى بێى دلێ خوە هەڤژینى پێکئینا بوو (نە ژبەر هندێ کو کێماسییەک ل هەڤژینا وى هەبوو). لێ ژبەر هندێ کو چ ئەڤینى دگەل نەبوو، ل سەر هاتبوو سەپاندن: "تنێ من دڤیا، ئەوا بێتە بەر دلێ من، ب رێیا ئەڤینێ بت... نە ب بڕیارا بابێ من بت... بپ٧٦". ئەڤ بۆیەرێن هەردوو کرینە ئێخسیرێن هەڤژینییەکا نە ژدل، ببوو ئەگەرێ گەهاندنا هەردووان کو دخۆشییەکا بێ توخیبدا بژین. لێ دەمێ سیلاڤ داخوازێ ژێ دکەت کو هەردوو یا ب دلێ خوە بکەن (تو ژنا خوە بەردە، ئەز دێ مێرێ خوە بەردم. ئەم دێ بنە مالەک، دێ بنە ژن و مێرێن ب دروستى... بپ١١٤). ئانکو بەرێ کامیرێ ژ دل و دلینیێ بەر ب هزر و مەژیڤە دچیت. ل ڤێرە جڤاک دهێتە دناڤ بابەتیدا و ب مەژییەکێ جڤاکپەروەر سەرەدەریێ دگەل پرۆژێ پێکڤەژیان و هەڤژینیێ دکەت. لێ هەوار نەشێت (ژبەر حوکمێ جڤاکى) دەست ژ خێزانا خوە بەردەت: "ئەو نە تنێ ژنا منە، دوتماما منە ژى، دایکا سێ بچووکێن منە... بپ٧٣"، "من چو خرابى ژێ نەدیتییە، دێ چاوا بەردم؟! دێ چ بێژمە کەس و کارێن خوە؟ دێ چ بێژمە بابێ خوە؟ ببۆرە، ئەز نەشێم، نە ب ساناهییە... بپ١٦١". ئەڤجا دبیتە سەمەدێ ژێکدووربوونا وان. هەوار دکەڤتە دمالڤە و هەکو دەردکەڤیت ژى، دپڕانى یا جاراندا، پولیس وى ب سەرخۆشى دگەهیننە مال. لێ ژنا وى هاریکارى یا وى دکەت کو سیلاڤی ژبیر بکەت و وێ مالا هەژى دچاڤێن جڤاکیدا بپارێزیت (هەم ژبەر بنەمالێ و هەم ژبەر زارۆکان). سیلاڤ ژى دکەفتە دبن کونترۆلا مێرێ خوەڤە و پشتى نەمانا ئەڤینى یا گیانى بەر ب وێ خوەفرۆتنێڤە دچیت، ئەوا ئەو ژبەر رەڤى. لێ ئەڤ جارە نە ل بن دەستێ خەسوویێیە، بەلکو ب دەستێ مێرێ خوە دهێتە فرۆتن. د ڤێ رۆمانێدا، نڤیسەر پشتەڤانى یا هەڤبەندى یێن ژدەرڤەى بازنەیێ هەڤژینیێ دکەت (ئەگەر ژدل و راستگۆ بیت). پشتى سیلاڤ ژ هەوارى دوور دکەڤیت، دبێژتە خوە:

-    ئەڤە چەند سال بوون، ئەز دخوەشییەکا تایبەتدا دژیام، کەسێ ئاگەھ ژ مە نەبوو. من چ کر؟ من چ ئینا سەرێ خوە؟ هەر یێ من بوو. من ژ ژنا وى پتر ددیت. چ دلڕەشى بوو من کرى... ب١٢٣.

-    ب دەنگەکێ بلند کرە هەوار: هەوار... دێ چاوا ژ عەشقا تە رزگار بم؟! دێ چاوا گەهمە تە؟! دێ چاوا دیسا تە رازى کم... بپ١٦٢.

-    کا تو بێبەخت. تە ئەز فێرى خوەفرۆتنێ کرم. وەرە ئەز پێدڤى تەمە... بپ١٧٤.

نڤیسەر د هۆشدارى یا خوەدا، پشتەڤانێ دل و دلینى یا مرۆڤییە کو ب شێوەیەکێ نۆرمال دەربرینێ ژ هەستێن خوە یێن هەلگرتى بکەت. لێ ب ئاوایەکێ نەهۆشى پاڵپشتى یا هەڤژینى یا مەژ و هزرێ دکەت، کو موبارەکى و هەژیتى یا جڤاکى هەیە. ئەڤ دووانى یا پەهلەوان و نڤیسەر ب هەڤرا کەفتینە تێدا، رەنگڤەدانا عورف و عەدەت و پەروەردەیا جڤاکییە. ئەو تێگەهێ کو سیلاڤ بەر ب خوەفرۆتنێڤە دچیت و هەوار بەر ب هەڤسەنگى یا خێزانێڤە دچیت. تێگەهەکێ نێرسالارییە و چ وێ تێگەهى جودا نینە، ئەوا برایێ سیلاڤێ ل گەل کرى. ئەگەر نە، نڤیسەر دشیا کو سیلاڤێ ژ مێرێ بدەتە بەردان، یان پشتى وێ ئەڤینیێ هەموو خۆشى یێن ژیانێ ل خوە حەرام بکەت، یان ژى پەنایێ ببەتە بەر هاریکارى یا پۆلیسان... هتد. وەسا دیارە نڤیسەرى هەست ب ڤێ دووانى یا هزرى کرییە، لەوا ب هەولدانەکا نەگەلەک سەرکەفتى، پەهلەوانێ خوە ژى گونەهبار دکەت: "تو ژى وەک وانى، تو ژى وەک برایێ منى، وەک مێرێ منى، چو ژ وان جودا نینى... بپ١٧٥". ئەڤ گونەهبارکرنا پەهلەوانى، هەڤسەنگییەکێ دئیختە سەر هەلویستێ نڤیسەرى و پەیاما وى یا ل پشت رێزکان پێ ئاشکرا دبیت، کو ئازراندنا بابەتەکێ جڤاکییە و فەرە ئەم هەمى ب کوورى هزرا خوە تێدا بکەین. هەرچەندە د هەوڵدانەکا پێشوەختا دووبارەبوونا نیشانێن ترۆماییدا، ئیشارەتێ ددەتە ڤێ خالا ژێگۆتى: "ئەز ژ دنیایێ هەموو یێ دترسم. ئەز وەسا هزر دکم، هەر زەلامێ بەرێ خوە ددەتە من، تشتەک ژ من دڤێت. ئەز ژ تە ژى دترسم... بپ١٣٣". لێ دگەرمە گەرما خۆشى یا ئەڤینیێدا، ئەو ترس دهێتە ڤەرەڤاندن، کو نیشانا ئەڤیندارى و عەشقەکا راستگۆیە.

وەکو هەموو رۆمانێن نڤیسەرى و یێن دەڤەرێ، ئاماژە ب هندەک بابەتێن جڤاکى و نیشانێن ترۆمایا دەروونى ددەت. د وەسفکرنا جڤاکێ کوللەکتیڤدا، کو سەرا کەنى یا کچکەکا هێژ سنێلە هەمى باژێرک ئینا ئیشتەئیشتێ، ددەتە خویاکرن: "ل ڤى باژێرى، کەس نەشێت چو نهێنییان ڤەشێرت، کەس نەشێت خوارنەک خوەش بێ جیرانان بخۆت... بپ٢٢". ئانکو جڤاک هەموو دخۆشى و نەخۆشییاندا هەڤگرتینە و وەکو کەرییەکێ پەزى پێکڤە ژیانێ ددۆمینن. هەروەسا دوەسفکرنا رەوشا گەنجان و هەڤبەندى یا وان ب ژنانڤە، دبێژیت: "ژ هشکاتییا باژێرى... تولازێن وى ل سەر لێڤا جاددەیێ، وەک پۆلیسێن زێرەڤانیێ، چاڤزلکانێ دگەل عەبا رەشان دکن... بپ٢٣". ئانکو هێشتا ژنێ ئەو ئازادى نینە کو بێى عەبا دەرکەڤیتە بازارى. ئەڤە ژى ئیشارەتەکە ژبۆ جڤاکەکێ دائێخستیێ نێرسالارى کو ژن تێدا یا تەپەسەرکرییە. سەبارەت دووانیزما خەلکێ جڤاکپەروەر دناڤبەرا هۆڤاتى یا (ئەو)ى و کونترۆلکرنا ئایینى یا (ئەز)ێ و نڤستنا (ئەزا بلند)دا، مێرێ ئێکێ یێ سیلاڤێ پتشى ئەشکەنجەدانێ و ئیغتصابکرنا ژبەر و پشتڤە، پشتى ژبەر دڕاندنا هەموو جلکێن وێ و نەهێلانا برنا دەرپێکورتکێ خوە (ددەمێ بڕیاردانا بەردانا وێدا)، حەمەیێ زێڕنگر دبێژتێ: "نەچە، هەتا ئەز سەرێ خوە بشۆم و نڤێژا سپێدەیێ بکم... بپ١٠٤". ئەڤە تەهەکومەکا نڤیسەرییە ل سەر هندەک رەفتارێن قەبوولکرى یێن جڤاکى، کو هندەک ئاییردەیێن ئایینى دچاڤێن جڤاکیدا دهێنە دیتن و هەموو هۆڤاتى و فێلبازى یێن دى پێ دهێنە ڤەشارتن. ئانکو تڕانەپێکرنەکا ئاشکرا یا نڤیسەرییە ب ڤێ دووانیزما هەیى دناڤ جڤاکیدا.

کۆمەکا موفارەقەیێن جوانیێن وێژەیى دناڤبەرا ئەڤینیێ و قەحبەییێدا، دناڤبەرا گۆتنێن دەستپێکى یێن ئەڤینداریێ و گۆتنێن نەهەڤژینیێدا هەنە کو جارنا وەکو خەون و جارنا وەکو هەلوەسە بۆ دهێن. بۆ نموونە؛ پشتى دکەڤتە دناڤ داڤا مێرێ گەواد و قوندەهدا، گۆتنا خەسوویا وێ دهێتە بیرێ، دەمێ گۆتیێ: "چیە تو خوە ل سەر سەرێ مە شەریف دکى؟ ما ئەم نزانن تە چەند گان دایینە، بەرى تو بێیە دمالا مەدا؟!... بپ٥٣". ل وى سەردەمى، وێ ئەڤ گۆتنە ب توندە رەت دکر و ب کێمبهایى ل خەسوو و بنەمالا مێرێ خوە دنێرى. لێ نۆکە ئاخفتنا وێ یا دبیتە راستى و ل شوینا خەسوویا وێ (بێى مێرێ وێ گەوادیێ بۆ بکەت)، مێرێ وێ ب خوە ب ڤى کارى رادبیت، ئەڤە داکەفتنەکا مەزنترە ژ یا ئێکێ. ل دوماهى یا رۆمانێ ژى ب شێوەیێ هەلوەسەیەکا دیتنێ خویا دکەت، کو ددەستێن مێرى و خەسوویێدا دبیتە قەرقوودە: "مراد ژ وێڤە هات. ل هنداڤ وى سەرێ تژى خوین و هیڤى راوەستیا. ل پێش چاڤێن هەموویان، دۆخینا خوە ڤەکر، میزتە ب کلۆخکێ وێڤە... بپ١٧٦".

کۆمەکا نیشانێن دووبارەبوونا ترۆمایێ ژى، ب شێوەیەکێ هۆستایانە بەلى کرینە، دەمێ هەوار ژێ دوور دبیت، ترسا وێ یا بەرێ ژ زەلامان دهاتە پێش چاڤان. دەمێ مێرێ وێ توندوتیژى دگەل بکاردئینا و ب تبلا شەهدێ ژکچینیێ ئێخستى، ئوو هەکو وێ ڤیاى د حەمامکا خوەڤە دەستپەڕێ بکەت، هەمان دیمەن هاتە پێش چاڤان: "بەرى تلا وێ یا شەهدێ نقۆن بت، کەنیا حەمەیێ زێڕنگر تژى گوهان بوو. جرفەک ڤێ کەت... بپ١٣٦". د ڤێ سەفەرا درێژا سیلاڤێدا، ئەم دکارین بێژین کو دچەندین قۆناغاندا بۆرییە هەتاکو گەهشتییە کەفتنا دوماهیێ کو قەحبەچییاتییە: قۆناغا ژیانا نۆرمال و ئەڤینى یا ئێکێ، قۆناغا هەڤژینى یا نەژدل، قۆناغا هەڤژینى یا ژدل (لێ بڕیارا چەوت)، قۆناغا ئەڤینیێ و ئەنجامدانا کریارا سێکسى یا بارکرى ب ئەڤینییەکا دروست، ئوو قۆناغا قەحبەتى و قەحبەچییاتیێ. جوداهى یا قەحبەتى و قەحبەچییاتیێ ئەوە کو قەحبە بازرگانیێ ب لەشێ خوە دکەت و ب شێوەیەکێ رێکخستى بازارى پێ دکەت. لێ قەحبەچییاتى، هەر کریارەکا هەڤبەند بیت ب سێکسێ نەرەوا و نەژدل، دبیت نرخەکێ راستەوخۆیێ هەنۆکەیى هەبیت و دبیت ئەو نرخە ب بەرژەوەندەکا گیرۆکریڤە هەڤبەند بیت.

٢. سڤێتلانا:

سڤێتلانا ناڤێ کچەکێیە کو ژ ئەنجامێ ئیغتصابکرنەکا مژدار و ژلایێ کەسەکێ نەدیارڤە هاتییە ئەنجامدان. دڤێ رۆمانێدا، نڤیسەرى شێوازێ رێکەفتێن بۆیەران ب سنسلەیا روودانێ بکارئینایە. هەموو روودان دناڤبەرا موسکۆ و ئەلمانیادا (میونیخ و نورنبێرگ) دقەومن، پڕانى یا پەهلەوانان ژى بیانینە (ژبلى ئازادێ کورد کو پەنابەرە ل ئەلمانیا). ل دەستپێکێ (١٩٩٠)، ژ بۆیەرێ ئیغتصابکرنا دایکا سڤێتلانایێ دەست پێ دکەت، کو شەڤا سەرێ سالێیە و هەموو خەلک یێ سەرخۆشە: "هند بوونە کەلەخ کەتن بەرپییا، هند دکۆشا هەڤالێن خوەدا نڤستن، هند ل سەر مێزێن ڤەخوارنێ دخەوچوون... بپ٨". پاشى ل ئاهەنگا رۆژبوونا سڤێتلانایێ، دیسا پڕانى یا خەلکى دسەرخۆشن و ب هەمان شێوەیێ دایکێ، سڤێتلانا ژى دهێتە ئیغتصابکرن (٢٠٠٦). ئەڤ هەردوو ئاماژە یێن ئیغتصابکرنا کچان د دەمێ ئاهەنگێ خۆشیێدا، نیشانا رەوشەکا نالەبارا جڤاکێ رۆسییە. دەمێ مرۆڤ د رەوشەکا نالەبار و قەیرانەکا دارایى یان دەروونیدا دژیت، پەنا بۆ خوە ژبیرڤەکرنێ دبەت و خوە سەرخۆش دکەن. ئوو ددەمێ سەرخۆشیێدا، مرۆڤى ئاگەھ ژ خوە و جڤاکى نامینیت، ئەڤجا بەر ب خوەرسکێن خوە یێن غەریزەییڤە دزڤڕیت و ب بێهۆشى هندەک کریارێن نەیاسایى ئەنجامددەت. هەبوونا هەردوو کریارێن تەعدایى یا سێکسى د دوو ئاهەنگێن کەلتۆریدا (سەرێ سالێ و رۆژبوون)، نیشانا نەبوون یان لاوازى یا یاسایێیە ل وان جهێن ئاهەنگ لێ هاتینە گێران. ب کورتى نڤیسەر یێ بەحسى رەوشەکا جڤاکى یا وەلاتەکى دکەت، کو وەلاتەکێ ب هێز و یەک ژ جەمسەرێن جیهانێیە، مللەتەکێ هەژار و بێ یاسا و بێزار دناڤدا دژیت. ئەڤە ژى ئاماژەیە ژبۆ پشتگوھ هاڤێتنا مللەتى دناڤ سیستەمێن شمولى و دکتاتۆریدا. هەروەسا هەڤبەرکرنا (ئەز) و (ئەو) و (ئەزا بلند) یا کەسایەتى یا مرۆڤییە کو هەردەمێ عورفێن ئەزێ و کونترۆڵا ئەزا بلند، بەر ب لاوازیێڤە بچن، مرۆڤ دێ بەر ب پاڵێنەر و غەریزەیێن خوەیێن ئاژەلیڤە زڤڕیت (ئەو).

هەر ئەڤ رەوشا ژێگۆتییە کو گەنجەکا وەکو سڤێتلانایێ، وەڵاتێ خوە ب هێلیت و بەر ب پەنابەریێڤە دچیت. ل کەمپەکا ئەلمانیا، حەز ژ کورەکێ جوهى دکەت (ئەلێکس) و کریارەکا سێکسى یا ب هزر و بڕیار دگەل دکەت، بەلکو ببیتە سەدەمێ پێکئینانا هەڤژینیێ داکو ببیتە خودان خێزان و بکەڤیتە دناڤ ژیانەکا رێکوپێک و سروشتیدا: "پا هەکە ئەز ئاڤز بووم؟... ئاڤزا چ؟!.. تە ئەز گام بێى کوندۆم و بێى چو رێگر. ئەز دێ ئاڤز بم، ئەز کچم، نە وەک تە زەلامم... بپ١٢". هەرچەندە ئەڤە تێگەهەکێ جڤاکێن موسلمان و رۆژهەلاتییە ژبۆ هەڤبەندى یا دناڤبەرا زەلامان و کچێن کچیندا، لێ نڤیسەرى ژ پاشخانا جڤاکى یا کچەکا کورد ئینادەر و ب شێوەیێ پێڤەنانێ (ئیسقاتێ)، هاڤێتییە سەر کچەکا رۆس. ل دەف کوردان، دەمێ کچ ژ کچینیێ دکەڤیت، فەرە بکەر خوە لێ بکەتە خودان و مەهر بکەت. لێ دجڤاکێن ئورۆپى و رۆژاڤاییدا، ئەڤ هزرە دسەرێ واندا نینە، چونکو پڕانى یا کچان هەتا دەمێ شووکرنێ نە کچینن. ل گورەى سیستەمێ پەروەردەیى یا وان، هندى کچ نەشووکرى بیت، ئازادە سێکسى دگەل هەڤالێ خوە بکەت، لێ دەمێ شوو دکەت، هینگى وێ ئازادیێ ژدەستددەت و هەر پەیوەندییەکا ژدەرڤەى قەفەسکا هەڤژینیێ دبیتە سەدەمێ ژێکڤەبوونێ. ئەڤجا دەمێ سڤێتلانا دبێژتە ئەلیکسى: "ئەم دێ خوە گرن، لێ ژبیر نەکە، تو بابێ وى یى، خوە بەرزە نەکە... بپ١٢". ئەڤ داکۆکیکرنە، وێ نیشانێ ددەت کو ئەڤینى یا وێ دگەل ئەلێکسى، ب رێکا مەژ و هزرکرنێ هاتییە کرن و دبیت پلانرێژکرى و مەرەمدار بیت ژى. مەرەما هەرە گرنگ ئەوە کو دوو پەنابەرێن کەمپێ هەڤکارى یا هەڤ بکەن، هەتاکو سەمتا ژیانا هەر ئێکى دهێتە دەستنیشانکرن. نەدوورە ژى، ژبەر هندێ بیت کو خانى و هندەک هێسانکارى یێن دى، زووتر ددەنە کەسانێن خێزاندار. ب سەدان کچ و کورێن کوردان ژى (هەروەکو ژێ دبێژن)، ئەڤ جۆرێ هەڤژینى یا بەرژەوەندخواز ئەنجامداینە ژبۆ چوونا ژ دەرڤە و ب دەستڤەئینانا مافێن پەنابەریێ. نەدوورە ژى، زێدەهشیارییەکا ترۆمایى بیت، کو سەربۆرا دایکا وێ دگەل وێ دووبارە نەبیتەڤە، کو بێى هەبوونا بابێ زارۆکەکێ بێگونەه بینتە دنیایێ و پاشى ل مالەکا دى بهێتە خودانکرن (هەروەکو ب سەرێ وێ هاتى، کو پشتى ژدایکبوونێ دگەل داپیر و باپیرێ خوە مەزن دبیت). پشتى کورەکى ب ناڤێ ساشا دئیننە دنیایێ و دبنە خودان خانى و خێزان، مێرێ وێ ژبۆ ژێ ستاندنا خانى و زارۆکێ خوە، وێ ب تنێ (ب هێزا یاسایێ) ژ مال دەردئێخیت و دکەڤتە کولانا. د ڤێ رەوشا نالەباردا، دکەڤتە داڤێن ئەڤینى یا کوردەکى. لێ چونکو هێشتا ژ ترۆمایا ژدەستدان و ژێڤەقەتیانێ رزگارنەبوویە (ژدەستدانا خانى و خێزانێ، ژێڤەقەتیان ژ کورێ خوە)، باوەرى ب چ کەسان ناهێت. لێ ئازادێ کورد ب چاڤێ ئەڤیندارەکى سەرەدەریێ دگەل دکەت.  

-    ئەز ژ هەموو نێران دترسم... بپ١٦.

-    ئەز ژدل حەز ژ تە دکم../ وە نینە، ئەز باوەرناکم. تە تنێ ژبۆ گانا ئەز دڤێم../ ببوورە سڤێتلانا، ژنێن گانا تژى کولانێن باژێرینە، من تو وەک هەڤال دڤێى، باوەر بکە... بپ١٧.

-    ببوورە، ئەز باوەر ژ چ نێرا ناکم. من بگەهینە ماڵ... بپ١٨.

دەمێ ئازاد وێ ل سەر هەموو ژنێن باژێرى دچێترینیت، چریسکەکا ئەڤینیێ دچاڤاندا دبرسقیت. لێ ئەو ب شرۆڤەکرنەکا لۆژیکا کەڤن (سەدەم و دەرئەنجام) خوە ژێ ددەتە پاش و باوەر ژێ ناکەت: هەموو نێران ئەز بۆ گانا دڤێم (پێشەکییا مەزن)، تو ژى نێرى (پێشەکییا بچووک)، تە ژى وەک  وان ئەز بۆ گانا دڤێم (ئەنجام). ئەگەر ب هوورى ل ڤێ پەرەگرافێ بنێرین، دێ بینین کو هەمان دەستپێکا چیرۆکا هەوار و سیلاڤێیە. کورەکێ پێدڤى ب چیرۆکەکا ئەڤینداریێ و کچەکا پێدڤى ب هەڤالەکى کو دلێ خوە بۆ ڤەکەت و خوە ل بەر سیبەرا وى بپارێزیت. ئەڤ نیازێن هەردووان ب ئاشکرایى دیار دبن، دەمێ هەر ئێک جهێ ژڤانى دەستنیشان دکەت: "وى دڤیا وێ بکێشتە جهەکێ تارى و دوور ژ چاڤان. وێ دڤیا ل جهەکێ رۆن و دیار روونن... بپ٢٨". ئانکو وێ دڤیا ببیتە هەڤالا ئازادى، لێ ئازادى دڤیا ببیتە عەشیقا وى و سێکسى دگەل بکەت. ئەڤ ئەڤینى یا ئێکلایەنى یا ئاشکرا و هەبوونا کریارا سێکسى دگەلدا، نیشانا بەرژەوەندیێیە (خۆ ئەگەر بەرژەوەندییەکا مینەڤى بیت ژى). ئەڤە ژى بەرێ ددەتە هەبوونا ئەڤینەکا ددلێ هەر ئێکیدا، سڤێتلانا حەز ژ کەسەکێ دى دکەت ب ناڤێ ئیڤان، ئەو ژى خودان و ژن و ماڵە و بۆ سێکسى دگەل گەلەک ژنێن دى نڤستییە و دنڤیت: "ژ وێ رۆژێ، هەر چەند رۆژەکان، ئەو کچ یان هەر نێچیرەکا دکەتە دەستان، ل وى جهى و ل سەر وى تەختى دکرە مێڤان... بپ٢٣". مەرەم ب وى جهى و وى تەختى، پشتا ترومبێلا وییە کو یا بەرفرەھ بوو، تێرا نڤستنا ژن و مێرەکى دکر. سڤێتلانا ل گەلەک جهان و دگەلەک دانوستاندنان، وێ ئیشارەتێ ددەتێ کو وێ وەک هەڤال ئەو دڤێت، نە وەک ئەڤیندار. لێ نەچارم خوە ب دەست تەڤە بەردەم: "دەڤێ خوە هاڤێتە دەڤێ وێ، ژ ترسا جارەکا دى برسى بمینیت، بەرەڤانى ژ لێڤێن خوە نەکر... بپ٤٩". ئەڤ لەقتەیە باشترین نموونەیا سێکسێ بێ ئەڤینى و بەرژەوەندخوازە. ل ڤێرە نڤیسەرى ڤیایە نیازپاکى یا سڤێتلانایێ نیشا بدەت، ل بەرانبەرى حەزا سێکسى یائازادى. هەردوویان پێدڤى ب هەڤ هەبوو، پێدڤى یا سڤێتلانایێ هەڤالەکێ دلۆڤان و وەفادارە، پێدڤى یا ئازادى سێکس بوو. هەر ئێکى بەرەڤانى ژ بەرژەوەندا خوە دکر، ب مەژ و هزرێ سەرەدەرى دگەل هەڤ دکرن (نە ب دل و دلینیێ). سڤێتلانا ب ئاشکرایى دبێژتە ئازادى کو کەسەکێ دى د ژیانا وێدا هەیە و هەموو دل و دلینى یا وێ، ب وى کەسیڤە گرێدایە:

-    ببوورە دلێ من، من نەڤێت تو ب چاڤێن لەشفرۆشان بەرێ خوە بدیە من... بپ٢٩.

-    ئەز نەشێم دگەل تە بنڤم. ئەز نەشێم ژڤان ماچان پتر بدمە تە... بپ٣٠.

-    تو دزانى تو مێرێ سیێ یى دگەل من دنڤى؟!... بپ٣٤.

-    ئەز نەشێم هۆسا دگەل تە بنڤم. من هەڤالەک هەیە ئەز ژ دل حەز ژێ دکم، ئەم دێ بنە ژن و مێر. دێ ب دروستى دگەل من ژیت... بپ٣٥.

-    ببوورە، ئەز نەشێم وەک لەشفرۆشان بژیم... ئەز نەشێم دگەل دوو مێران بژیم... بپ٣٦.

-    ئەڤە ئەز هاتم. تە چ دڤێت دگەل خوە بینم؟.. من مرۆڤایەتى دڤێت... بپ٤٣.

-    من نەڤێت بارێ تە گران بکم. ئەز دزانم تو خودان ژن و بچووکى.../ تو ژى بچووکێن منى../ خوەزى تە ب وى چاڤى بەرێ خوە دابا من... بپ٤٤-٤٥.

-    لێ هۆسا بۆ من دەست نادت، ئەز نەشێم حەز ژ مێرەکێ خودان بکم... بپ٤٦.

ئەڤ دانوستاندنێن بۆرى، ئاماژەنە ژبۆ نیازپاکى و بێگەردى یا وێ ژبۆ هەڤالینى و رێزگرتنا ئازادى (ئەگەر نەبێژین ئەڤینى یا وێ). دهەمان دەمدا ژى، ئاماژەنە ژبۆ تێرکرنا غەریزەیا سێکسى ل دەف پەهلەوانى. لێ نیازێن هەردووان، ڤالانە ژ ئەڤینییەکا گەرم و ژدل. سەرەراى ڤێ چەندێ ژى، هەر ئێک دگەهتە مەرەما خوە، ئانکو ئازاد کریارا سێکسى دگەل دکەت و ئەو ژى دناڤ لەپێن ئازاددا، هەست ب گرنگى و بهایێ خوە دکەت. ئەرێ ئەم دێ چ بێژینە ڤێ هەڤبەندیێ؟ ئایا ئەڤینییە یان لەشفرۆشییە؟ هەلبەت نە ئەڤینییە چونکو سڤێـلانایێ ئەڤیندارەکێ دى هەیە و ئازاد ژى ب چاڤێ نێچیرەکێ لێ دنێریت (هەرچەندە نێچیرەکا تایبەتە). نە لەشفرۆشییە ژى، چونکو ئەوا بۆ ئازادى دهێتە پێشکێشکرن، نە ژبۆ هەر کەسەکێ هەمان نرخ هەیى دهێتە پێشکێشکرن. هەروەسا نەرازیبوونا سڤێتلانایێ ژ کریارا سێکسى، هەستەکا ب گونەهێ و لەشفرۆشیێ ل دەف پەیدا دکەت و خوە ب ژنەکا بێنامووس ددەتە وەسفکرن: "ژبۆ من تو جوانترین ژن و شرینترین و (لێ ڤەدگەرینیت) و بێنامووسترین ژن و... بپ٤٥". نیشانا هندێیە کو نە لەشفرۆشە. ئەڤجا ئەگەر قەحبەتى نەبیت و قەحبەچییاتى نەبیت و ئەڤینى ژى نەبیت، پا دێ چ بیت؟ دبیت هەڤالینى بیت؟! یان ژى دبیت عەشیقە بیت؟! یان ژى دبیت جۆرەکێ تایبەتێ لەشفرۆشیێ بیت.  

دتێگەهێ جڤاکێن مە و عەرەباندا، کەسەکێ پێچێبوویى، دشێت هەڤالینى یا ژنەکێ بکەت، کو عەشیقا وى ب تنێ بیت. هەردەمێ ژن پێدڤى هاریکارییەکێ دبیت، دێ پەنایێ بۆ عەشیقێ خوە بەت، دەمێ زەلام ژى پێدڤى سێکسى دبیت، دێ چیتە دەف عەشیقا خوە یا هەلبژارتى. ب ڤێ چەندێ ژى، نە ژن دبیتە قەحبەیەکا فەرمى و نە زەلام دبیتە ئەڤیندارەکێ راستگۆ. لەوا ئەم دشێین ب جۆرەکێ دى یێ لەشفرۆشیێ بدانین. ئەم دکارین ناڤێ لەشفرۆشى یا تایبەت بدانینە سەر. ئەڤ جۆرێ هەڤبەندییان دناڤ تەخا پایەبەرزا ئورستکراتیدا هەیە، کو دەولەمەندەک هاریکارى یا ژنەکا نەلەشفرۆش دکەت، لێ ژن ل بەرانبەرى وێ هاریکاریێ کریارا سێکسى دگەل دکەت. دبیت قەحبەتى یا ڤەشارتى ناڤەکێ باش بیت، بۆ ڤى جۆرێ لەشفرۆشیێ. لێ دبیت کەسەک پرسیار بکەت، ما قەحبەتى دهێتە ڤەشارتن؟! بەلێ دهێتە ڤەشارتن، دەمێ ژنەکا رێزدار و ژبۆ مەرەمەکا بازرگانیێ یان پلە و پۆستەکێ جڤاکى لەشێ خوە دکەتە پارسەنگ، ئوو دناڤ جڤاکیدا ژى کەسەکا رێزدار و قەبوولکرى بیت، هینگى دێ شێین بێژینێ لەشفرۆشى یا ڤەشارتى. هەرچەندە دپڕانى یا فلم و درامایێن میسریدا، ئەڤ جۆرێ قەحبەتیێ ل دوماهى یا درامایێ ئاشکرا دبیت و پیڤازا وێ دناڤ جڤاکیدا سۆر دبیت. لێ ئەڤە پەیاما ئاراستەکرییە، نە کەتوارێ مومارەسەکرییە.

هەرچەوا بیت، سڤێتلانا دکەفتە دناڤ ژیانەکا ئالۆز و بێخوداندا: "هەر جهێ تو بچیێ پارە دڤێن. و هەر کەسێ تو سلاڤ بکیێ گان دڤێن... بپ٧٤". ئوو دناڤبەرا ئەڤینیێ و عەشیقەییێ و لەشفرۆشیێ و پێکئینانا خێزانەکا رێکوپێکدا دگەریێت و چ ب دەست ناکەڤیت: "مێرێ بەرێ وێ ژدل ڤیا بوو. وى ئەو هێلا و ب دویف ئێکا دى کەت. هەڤاڵێ نهۆ، ژدل دڤێت، لێ وى سێ چوار هەڤالێن دى یێن هەین. ئازاد یێ دل ساخە و مەردە، لێ خودان ژن و بچووکە... بپ٨٦".

ب درێژاهى یا رۆمانێ، دوو چیرۆکێن ئەڤینى یا راستەقینە دژیانا سڤێتلانایێدا دهێنە دیتن: چیرۆکا ئێکێ، دگەل ئیڤانى بوو. هەرچەندە ئیڤان کەسەکێ پیر بوو، لێ سڤێتلانایێ ژ دل حەز ژێ دکر. دبیت هەستەکا بابینیێ ل دەف هەبوو بیت، یان گەرەوتژیکرنا نەبوونا بابێ بیت. یان ژى دبیت دلۆڤانى یا باپیرێ خوە ل دەف دیت بیت. راستگۆیى یا ڤێ چیرۆکێ، د دوودلى یا وێ یا دگەل ئازاد دا بوو، هەتا ئازاد دشیا ل دەف بنڤیت، کۆمەکا سوحبەتێن ئەڤینیێ و هاریکارى بۆ پێشکێش دکرن، ل داویێ ژى ب نەچارى کریارا سێکسى دگەل دکر. ئانکو هەردەم ئازاد دەستپێشخەر بوو، ئوو ئەو ژ نەدل و ب هەستەکا بارکرى ب گونەهباریێ رازى دبوو. لێ دگەل ئیڤانى هەردەم ئەو یا دەستپێشخەر بوو: "وەک هەر جار وێ دەست ب بلندکرنا ئالاى کر.. دەڤێ خوە هاڤێتە دەڤێ ئیڤان و ب عەشقەکا دژوار مێت... بپ٥٩". ئەڤ دەستپێشخەرى یا سێکسى، نە ئاماژەیا برسیبوونا سێکسییە، چونکو ئازاد هەردەم یێ ئامادە بوو سێکسى دگەل بکەت. لێ ژ دل و دلینییەکا گەرم و فیرهایى یا بارکرى ب ئەڤینییەکا کوور دەردکەفت. خۆ دخەونێن خەواڤیێدا ژى، خەونان ب ئیڤانڤە دبینیت (نە ب ئازاد): "ئەز یا ژ موسکۆ فڕیم و هاتیم... ئەز گەلەک یا ژتە خەریب بوویم../ دێ وەرە ژوور دلێ من، ئەز ژى یێ ژ لێڤێن تە خەریب بوویم.../ بپ٥٥". ئانکو سڤێتلانا ژ وى و دلۆڤانى و ئەڤینى یا وى خەریب بوویە. لێ ئەو یێ ژ لەشێ وێ خەریب بووى. ئوو دەمێ ژ خەو هشیار دبیت، نڤیسەر ب وەسفکرنا جوان، خۆشى یا خویا دکەت: "سڤێتلانا، راست رابوو سەر خوە، تژى ژوورا وێ رۆناهیا رۆژێیە. ل دۆر خوە زڤرى، کەس نەدیت. بەندۆشکێن مەمکێن وێ دڤەکرى بوون، دەرپێکورتکێ وێ دپیا نەبوو. تژى دەڤێ وێ تاما رامووسانێن گەرم بوون... بپ٥٦". لێ کا چەوا هەردەم وێ دگۆتە ئازاد کو دلێ وێ ل دەف کەسەکێ دییە، ئیڤانى ژى هەردەم دگۆتێ کو دلێ وى دگەل کەسەکا دییە:

-    ببوورە، سەرێ من و دلێ من ب ئێکا دیڤە مژوولە../ ئەز دزانم، لێ کەس وەکو من حەز ژ تە ناکت، تو دزانى../ دبت، لێ ئەز پتر حەز ژ وێ دکم، ببوورە، ئەڤە راستییە... بپ٦٠.

-    ئیڤان تو دشێى هندەک پارا بدیە من، بۆ دەمەکێ کورت؟../ پارە؟! ما دێ من پارە ژ کیڤە هەبن؟!... بپ٦٠.  

ئوو کا چەوا هەردەم ئازاد دگۆتێ کو یارییا ب تە دکەت: "کچێ ئەو ژى یاریا ب تە دکت وەکو یێ دى... بپ٣٦". وێ ژى دگۆتە ئێفان کو دلبەرا تە یاریا ب تە دکەت: "وێ تو نەڤێى، یاریا ب تە دکت... بپ٦٠". ئەڤجا سەرەراى دلێ وێ یێ دوور ژ ئازادى، ئازاد هەر یێ پێڤە گرێداى بوو، هاریکارى یا وێ دکر و خوارن و بیرە بۆ دکڕى. ئوو سەرەراى دلێ دوورێ ئیڤانى ژ وێ، ئەو هەر یا پێڤە گرێدایى بوو، هەرچەندە نەدحەواند و پارە ژى ددانێ. ئەڤە وێ رامانێ ددەت کو هەردووان، وەکو عەشیقە، سەرەدەرى دگەل لەشێ وێ یێ جوان دکر. لێ دلێ وێ ب هەموو هەست و نەست و هیڤیڤە، دگەل ئیڤانى بوو. لەوا ئەم دبێژین کو وێ چیرۆکەکا ئەڤینیێ دگەل ئیڤان هەبوو. لێ دەمێ ژ ئیڤان بێهیڤى دبیت و پێ دحەسیێت کو وى هەڤبەندى دگەل کۆمەکا ژنێن دى هەنە. وى دهێلیت و جارەکا دى دمینتە بێخودان و بێ هەڤال و بێ پارە، پەیوەندیێ ب ئازادى دکەت: "وەک گەلەک جاران ل پانزینخانەکێ دوو پاکیتێن جگارا و چوار قودیکێن بیرێ و هندەک کوندۆم کڕین و قەستا باخچەیێ گشتى کر... بپ٤٣".

لێ چیرۆکا عەشقا وێ دگەل ئازادى هینگى دەست پێ دکەت، دەمێ کورێ وێ و خانیێ وێ بۆ هاتینە زڤراندن. هندى ئەو پێدڤى یا هاریکارى یا ئازادى، ب چاڤەکێ شکەستى و مینا عەشیقەیەکا بەرژەوەندخواز سەرەدەرى دگەل داخوازى یێن بەردەوام دکرن. لێ دەمێ ب مال کەفتى، وەکو کەسەکا ئازاد و ئەڤیندار سەرەدەریێ دگەل ئازاد دکەت، ئەو تەلەفۆنا وى دکەت و خەریبى یا خوە بۆ دیار دکەت: "ئەڤە جارا ئێکێیە، تو تەلەفۆنا من دکى ژبۆ سێکسى. هەر جار من هزار هیڤى دکرن، هەتا مە کارەک دکر!... بپ٩٩". ئوو پشتى ژ ئەڤینى یا خوە پشتراست دبیت کو وێ ئازاد ب راستگۆیى دڤێت، هزرا پێکئینانا خێزانەکێ دگەل دکەت. لێ کا چەوا هەوار ژ سیلاڤێ دوور کەفت، هەروەسا ئازاد ژى ژ سڤێتلانایێ دوور کەفت و دمینتە دماڵڤە و دەرناکەڤیت، چونکو وى نەدڤیا ژن و زارۆکێن خوە ل سەر خاترا ئەڤینى یا سڤێتلانایێ بهێلیت. ئوو کا چەوا هەڤژینا هەوارى چاڤێ خوە ل پەیوەندى یا مێرێ خوە دگەل سیلاڤێ دنقینیت، ب هەمان شێوە خێزانا ئازاد ژى، خوە تێ ناگەهینیت و ڤێ رۆمانێ ب ئاهەنگا پازدە سالى یا هەڤژینى یا وان ب دوماهیک دئینیت: "هەموو لڤین ب داوى هاتن، دەما کورێ مەزن، پرتا کێکێ یا ئێکێ کرییە دناڤ تلێن خوەدا و سۆز دا کەس بەرى دایکا وى، تام نەکتە کێکا پازدە سالیا داوەتا وێ... بپ١٢٤".

لێ فەرە ئەم تبابەکێ ل سەر پەیوەندى یا وێ و ئیڤانى راوەستێین. ئیڤان بابێ ئەلێکسى بوو، دەمێ ژ ئەلیکسى هاتییە بەردان، حەز ژ خەزوورێ خوە کر. ئەڤە ژى ئێکە ژ بابەتێن حەرامکرى و نەپەسەند ژلایێ جڤاکیڤە. دبیت کەسەک بێژیت، هەکو ژنەک دهێتە بەردان، ئێدى نامینیت مەحرەم. لێ نڤیسەرى ب ئاماژەیەکا کورت ئیشارەت دایە ڤێ چەندێ کو هێشتا ل کەمپێ چاڤێ خەزوورى ل سەر بوو، لێ دەمێ کور هاتییە دمەیدانێدا، وى بۆ دەمەکى خوە دوور کر و پاشى لێ زڤریڤە. ئەڤە بابەتەکێ دى یێ ئەنسێستێیە (زناکرنا دگەل مەحرەمان) کو نڤیسەرى ب وێرەکى خوە لێدایى و کرییە بابەتەکێ ئازراندیێ نەجڤاکى. نڤیسەر دشیا، ئیڤانى نەکەتە خەزوورێ سڤێتلانایێ، لێ ئەڤ هەڤبەندییە ب مەرەم چێکرییە، کو ئاماژە ب بابەتەکێ حەرامکریێ جڤاکى بدەت. ئوو دپڕانى یا رۆمانێن خوەدا، نڤیسەر بابەتێن جڤاکى ب شێوەیەکێ بەرچاڤ دناڤ بۆیەراندا بکار دئینیت. دڤێ رۆمانێدا ژى، ئاماژە ب هندەک رەفتارێن جڤاکێ ئورۆپایى ددەت. بۆ نموونە دەمێ سڤێتلانا دکەفتە دزیندانێدا، هەر زیندانییەکا ژن دڤیا پشتى دەرکەفتنێ دگەل وێ کار بکەت. ئانکو مەرەما نڤیسەرى ئەوە بێژیت کو زیندان زەمینەیەکا خۆشکرییە ژبۆ چێکرنا تاوانبارێن پاشەرۆژێ. دزیندانێڤە خەلک فێرى هندەک رەفتارێن دى و هندەک تاوانبارى یێن دبیت. دلەقتەیەکا دیدا، دەمێ ژ خوارنێ تەڤاڤ دبن: "گلێشێ خوە کۆم کرن، هاڤێتنە دناڤ وێ تەنەکا گلێشى ئەوا ب رەخ وانڤەدا... بپ٤٨". ئەڤە ژى نیشانا وێ چەندێیە کو پاراستنا ژینگەهێ و کەلتۆرێ پاقژیێ ب پەروەردەیا مرۆڤیڤە گرێدایە. ئەو هەردوو ئەڤیندارێن ب دزیکیڤە ل قولاچەکا دارستانێ و ئەو کچا د کوپیتکا خەمگینى و بێزارى یا خوەدا، ژبیر نەکر کو گلێشێ خوە پاڤێژتە دتەنەکا گلێشیدا. ژلایەکێ دیڤە ژى، دڤیا بێژیت کو پرۆسەیا پەروەردەکرنێ نە ب شیرەت و گۆتنانە، فەرە حکومەت و دەستەلاتدار رێخۆشکەر بن ژبۆ ئەنجامدانا رەفتارا باش. دەمێ شەهرەدارى تەنەکەکا گلێشى ل نێزیکى هەموو جهێن روونشتنێ دادنیت، بەرێ خەلکى ددەتە پێگیریکرنێ. ئەزێ پشتراستم، ئەگەر تەنەکا گلێشى گەلەک یا ژێ دوور با، یان نەبا، ئەو ژى (وەکو مە) دا گلێشێ خوە ل جهێ خوە هێلن و دا چن.

دوو رۆمان و یەک ناڤەرۆک

ئەگەر مرۆڤ ب شێوەیەکێ سەرڤەسەرڤە ژى، ڤان هەردوو رۆمانان بخوینیت، هەر زوو دێ ئینتە دەر کو یەک ناڤەرۆکن و نڤیسەرى تنێ ناڤێن پەهلەوانان و جهێن بۆیەران گوهۆرینە. دەمێ هەر نڤیسەرەک پلانا رۆمانا خوە دادرێژیت، دێ بابەتێ سەرەکى و پەیامان و بۆیەران دارێژیت و پاشى دێ دناڤ کۆمەکا روودانێن سنسلەیى و پێکڤەگرێدایدا دارێژیت، کو خۆشیەکا وێژەیى و مفایەکێ ئەپستمى ژێ بهێتە دیتن. ئەگەر ئەم ل کەرەستەیێن سەرەکى یێن ڤان هەردوو رۆمانان بنێرین، دێ بینین هەمان کەرەستەنە کرینە ددوو قالباندا. ژبلى جهێ ژێ هاتنا هەردوو کاراکتەرێن مێ و هندەک گوهۆرینێن بچووک دداوى یا رۆمانێدا، هەموو کەرەستە و بۆیەر و هەتا تەکنیکێن ڤەگێرانێ ژى وەکهەڤن. ئەگەر ئەم بەراووردەکا نەگەلەک هوور (ڤالیکى- سەرڤەسەرڤە) دوەکهەڤى یا هەردوو رۆماناندا بکەین، دێ بینین کو:

-    کاراکتەرا مێ دهەردوو رۆماناندا جوان و ژێهاتى و مشت ئۆمێدن. هێشتا دبن ژیێ هەژدە سالیێدا تۆشى ترۆمایێن تەعدایى یا سێکسى دبن. درۆمانا سیلاڤدا، ب رێکا مێرێ وێ یێ پیر و د سڤێتلانایێدا ب رێکا کەسەکێ نەنیاس و دئاییردەکێ مژداردا تۆشى ئیغتصابێ دبن.

-    هەردوو کاراکتەرێن مێ، وەلاتێن خوە دهێلن و ل ئەلمانیا دبنە پەنابەر. هەرچەندە سیلاڤ ب مێرڤە دهێت، لێ سڤێتلانا ل ئەلمانیا هەڤژینیێ دکەت. لێ هەمان کریار و پەیامن، تنێ جوداهى یا عورف و عەدەتێن هەردوو جڤاکانە.

-    هەردوو کاراکتەرێن مێ، هەڤرووشى پەهلەوانەکێ کوردێ پەنابەر دبن، کو خودان خێزانێن ئێکگرتى و بەختەوەرن (ژن و زارۆک ژى هەنە). هەردوو سوحبەتخۆش و مەرد و کەسێن سەرکەفتینە دناڤ جڤاکێ پەنابەردا (ئانکو خودان کارن).

-    هەردوو ب دیتنا ئێکێ عاشق بووینە و ئەو عەشقە مایە دبیردانکێدا، هەتاکو دەرفەت بۆ هەلکەفتى. هەرچەندە یەک نڤیسەرە و ل کەنیا سیلاڤێ عاشق دبیت، کو چ جاران ئەڤیندارییەکا دوولایەنى نەبووە. یێ دى ژى، ب دیتنا سڤێتلایێ عاشق دبیت و دکەتە دلێ خوە کو ل دەف بنڤیت. هەردوو خەونان و خەواڤیێ ب بەردلکێن خوەڤە دبینن.

-    جێ ژڤان و دیدارێن هەردوو عاشقێن نێر، جهێن ژدەرڤەى باژێرینە و دپڕانى یا جاراندا ل دارستانێیە.

-    هەردوو کاراکتەرێن مێ، ب مێرن و دناڤ ژیانەکا هەڤژینى یا نەخۆشدا دژین. هەردووان خەمێن هەلگرتى و ترۆمایێن دەروونى هەنە. ب هێجەتا هاریکاریێ و ئارامکرنا دەروونى دئێخنە داڤێن ئەڤینییەکا ئاشۆپى.

-    شێوازێ دانوستاندن و قاییلکرنا هەردوو ژنێن ب مێر، ب هەمان تەکنیکێن قاییلکرنێ هاتینە ڤەگێران، کو مشتى پەیڤێن شرین و ئەڤینیێ و مەدحەکرنێنە (نهۆ هەموو تشتان ژبیر بکە، ئەز تێرا تە و ژن و بچووکێن خوە هەمە... بپ١٠٤- سڤێتلانا). مرۆڤ وەسا هزر دکەت کو د(پەرەگرافێ نورنبێرگ ٢٠٠٩/ چللە... بپ١٦- سڤێتلانا)دا، هەمان نڤیسن و دەربرینێن دەستپێکى یێن هەوار و سیلاڤێنە.

-    هەردوو ژ ئەگەرێ ئەڤینى یا دگەل هەردوو پەهلەوانێن کورد فێرى ئەڤینیێ دبن: (تە ئەز فێرى ئەڤینێ کرم...بپ١٢١- سڤێتلانا) کو دبیتە تایتلێ لاوەکیێ سیلاڤ و مێرێن وێ. ئوو هەردوو ژن (گونەها خوەیا خیانەتکرنا هەڤژینیێ)، ب پێدڤیبوونا سێکسى و هندەک دلدانەوەیێن مرۆڤایەتیێ بەهانە دکەن: (ئەز پێدڤى بووم. ئەز ژى مرۆڤم، من ژى هەست و ڤیان هەنە، وەک تە!... بپ١٠٠- سڤێتلانا).

-    مێرێن هەردوو کاراکتەرێن مێ، کەسانێن بێ وژدان و دڕندە و هۆڤن، یان ب کێمى ل دویف حەز و هیڤى یێن ژنێن خوە نینن. هەردوو ژ مێرێن خوە نەرازینە و تۆشى سەتمینێن دەروونى بووینە. هەردوو پەهلەوانێن کورد وەکو رزگارکەر هاتینە پێش و بۆ بووینە پەناگەھ.

-    هەردوو پەهلەوانێن کورد، ژلایێ سێکسیڤە دبرسینە و (دنیایێ گورى بنێن خوە دکن... بپ١١٣- سڤێتلانا)، ئوو گرێ یا زربەهرى یێن سێکسى ل دەف خوە، ئیسقات دکەنە سەر هەردوو کاراکتەرێن مێ. ئەڤجا ب عەشیقەیەکا لاوەکى سەرەدەریێ دگەل هەست و سۆز و راستگۆیى یا وان دکەن.

-    مێرێن هەردوو کاراکتەرێن مێ، ژلایێ سێکسیڤە نەشازن: یەک قوندەهە و ئەوێ دى پیدۆفیلە (پیرە و حەز ژ زارۆکان دکەن). ئەڤ هەردووە مێرێن دووێنە. هەردوو ژى (ژبلى هەردوو مێرێن خوە)، تنێ دگەل پەهلەوانان نڤستینە.

-    دسەربۆرا هەردوو ژناندا، کێشەیێن توندێن نەقەبوولکرى دناڤ خێزانێن واندا هەنە، یا ئێکێ دناڤ مالەکێدا دژیا وەکو جوبێ بوو (خەسوویا وێ گەوادى بۆ بووکێن خوە دکر)، یا دووێ ژى حەز ژ خەزوورێ خوە دکر.

-    پشتى هەردوو ژن دبنە عاشقێن هەردوو پەهلەوانان، ژێ داخواز دکەن کو ب هەڤرا خێزانەکێ پێک بینن و هەتا هەتایێ پێکڤە بژین. لێ هەردوو قەبوول ناکەن خێزانێن خوە تێک بدەن و ب دویف ئەڤینییەکا دى بکەڤن. ئانکو هەردوو پێگیرن ب عورف و عەدەتێن جڤاکێ خوە. ئەڤجا ژ نشکەکێفە خوە بەرزەدکەن و ژێ دوور دکەڤن.

-    هەردوو ژن پەشێمان دبن کو ئەڤ داخوازە ژ دلدارێن خوە کرین، چونکو بەرى هینگى دخۆشییەکا ئەبەدى دا بوون و پشتى چوونا وان، تۆشى شەلەژانى یا ژیانێ دبن. ئانکو هەردوو قورتاکەر ددەمێ پێدڤیدا ژمەیدانا شەڕى دڕەڤن و دەستێن خوە ب سەرێ خوە و زارۆکێن خوەڤە دنن.  

-    هەردوو کاراکتەرێن ئەڤیندارێن ژن، ب تەسلیمبوونەکا خەمگین خوە دوور دکەن و خێزانێن هەردوو پەهلەوانان ب ڤێ ئەڤیندارى یا ژ دەرڤەى چوارچۆڤێ خێزانێ دحەسیێن، چاڤێ خوە ل ڤێ کریارا نەجڤاکى دنقینن و پارێزگاریێ ل سەر ئێکگرتنا خێزانێن خوە دکەن.

-    هەردوو ژن، تۆشى بارگرانییەکا مەزن دبن، سیلاڤ دبیتە قەحبە و مێرێ وێ گەوادیێ بۆ دکەت، سڤێتلانا ژى ب تنێ دمینتە ل بەر بارێ ژیانێ، دگەل زارۆکەکێ نەشەرعیێ دزکیدا.

-    دەمێ هەردوو ژن ل دلدارێن خوە دگەریێن، دکەڤنە بەرانبەرى ژنێن وان، سیلاڤ ب رێکا تەلەفۆنێ پرسیار دکەت و ژنا هەوارى بەرسڤێ ددەت. سڤێتلانا دهێتە مالا ئازادى و ژنا وى دەرگەهى لێ ڤەدکەت. لێ ژنێن هەردوویان نابێژنێ و خوە تێناگەهینن.

-    ل دوماهیێ... ژنا هەوارى خوە تێوەر دکەت و دەستپێکەکا نوویا مشت خەریبى و ئەڤینى دگەل مێرێ خوە دەست پێ دکەت. ژنا ئازادى ژى، ئاهەنگا پازدە ساڵى یا دەهواتا خوە دگێریت دکەشەکێ خێزانیێ بەختەوەردا.

ئوو ئەگەر ئەم ب هوورى خوە بەردەینە دناڤ تەکنیکێن ڤەگێرانێ و دانوستاندنێن عەشقاویدا، دێ هەمان دەربرین و هزر و تێگەهان تێدا بینین. خوەڤەجوین و دووبارەبوونا بۆیەران دگەلەک رۆمانێن نڤیسەریدا دهێتە دیتن، لێ وەکهەڤى یا ڤان هەردوو رۆمان، هند نێزیکى ئێکە دگەهتە ئاستێ هەڤدەقیێ. ئەو ب خوە هەڤدەقى دناڤبەرا دوو نڤیسەرێن جودا دا و دبیت د دوو سەردەمێن جودا دا بهێتە کرن، لێ جوداهى یا دناڤبەرا ڤان هەردوو رۆماناندا، تنێ سێ سالن. ل دوماهى یا رۆمانا سیلاڤ و مێرێن وێ، هاتییە نڤیسین کو ل (نورنبێرگ ٢٢/١٠/٢٠٠٧) ب داوى هاتییە، لێ سڤێتلانا ل (نورنبێرگ ١٣/٧/٢٠١٠) ب داوى هاتییە. هەرچەندە سالا چاپبوونێ ل سەر هەردوو رۆمانان نەهاتییە نڤیسین، لێ ل گورەى نامەیەکا نڤیسەرى (بۆ من)، وەسا دیارە کو هەردوو رۆمان ل سالا ٢٠١٠ێ، ژ دوو دەزگەهێن جوداجودا هاتینە چاپکرن. ئەز وەسا هزر دکەم کو پشتى نڤیسەرى (سیلاڤ و مێرێن وێ) نڤیسى، دبیت یێ دوودل بیت دبەلاڤکرنا وێدا، چونکو حزوورا نڤیسەرى دناڤ پڕانى یا بۆیەراندا ئاشکرایە، لەوا ڤیایە هەمان، چیرۆکێ ل سەر کاراکتەرەکا ئورۆپى یان رۆسی ئیسقاتکەت. ئوو پشتى ژێ تەڤاڤبوویى، وەسا دیت کو میناکێ رۆمانەکا دى ب خۆڤە گرتییە. ئەڤجا هندەک گوهۆرینێن سڤک تێدا کرینە، وەکو پیرەمێرێ هەڤالێ سڤێتلانایێ بوویە خەزوورێ وێ، ل شوینا زۆردارى یا بنەمالێ و عورفێن جڤاکى یێن تەپەسەرکرنا ژنێ، ب کریارا ئیغتصابکرنێ گوهارتینە. ل شوینا پەهلەوانێ رۆماننڤیس کو دێ چیرۆکا سیلاڤێ کەتە رۆمانەک، پەهلەوانەکێ کارنەدیار (لێ پێچێبوویى) ئێخستییە درێکا سڤێتلانایێدا. ل شوینا دلدەرێژکرنا سیلاڤێ وەکو ئارامبوونەکا دەروونى دباوەشا پەهلەوانێ نڤیسەردا، سڤێتلانا برسى ب هەمان شێوە ب تێربوونێ و هاریکارى یا پەهلەوانى ئارام دبیت و هەست ب ئێمناهیێ دکەت. ل شوینا مێرێ گەواد و قوندەهێ سیلاڤێ، سڤێتلانایێ مێرەکێ قەلس و داڤدۆز هەیە کو ژپێخەمەت ب دەستڤەئینانا خانى و زارۆکى، فێلبازى و درەوان ل سڤێتلانایێ دکەت (هەلبەت چونکو قوندەهى ل ئورۆپا نە فهێتییەکا مەزنە وەکو ل دەف جڤاکێ کوردى). هەروەسا ل دوماهیێ ژى، ل شوینا سڤێتلانا بکەڤتە دناڤ تۆڕێن لەشفرۆشیێدا (چونکو لەشفرۆشى ب یاسایێ ل وێرێ دەستووردایە و نابیتە ئەگەرێ وێ ئاکاما ژ لەشفرۆشەکا کورد دروست دبیت)، ئەڤجا دووگیان کرییە و ئەو ب خوە سەرەدانا مالا ئازاد دکەت: "تنێ من دڤیا بێژمە ئازاد، ئەڤێ دزکێ من دا، کورێ وییە.. چاڤێ هەر چوار بچووکا و یێ دایکا وان کەتە زکێ وێ یێ مەزن بووى. ژن هشک بوو، کەتە سەر ئەردى. ئازاد وەک ستوونەکا ئاسنى د جهێ خوەدا ما چکلى. چەند پێنگاڤەکا چوو، ل سەر ملێ خوە زڤرى: تو دزانى دێ من ل کیڤە بینى... بپ١٢٣". ئەڤ هیڤى یا ل دوماهى یا سڤێتلانایێ، بەرکارێ کەلتۆرێ رۆژاڤاییە کو چ ئارێشە بێى چارەسەرى نینن و هەر کەسەکێ دچاڤێ جڤاکیدا بکەڤیت، شیانێن ڤەگەرێ هەنە و دێ سەرەدەرى دگەل بەرهەمێ وێ هێتە کرن (نەدگەل رابردوویێ وێ). دبیت ژى ڤیا بیت ئیشارەتەکا بەردەوامیبوونێ بدەتە ڤان جۆرە بۆیەران. نەدوورە ژى ڤیا بیت بێژیت، کو ئارێشێن جڤاکى یێن هەموو جڤاکان دگەوهەرێ خوەدا وەکهەڤن، لێ جوداهى تنێ هندەک ئاییردەیێن پەروەردەیى و کەلتۆرینە. دبیت ژى، دیتن و بۆچوونا من شاش بن و ئەڤا مە گۆتى هەموو وەنەبیت. وى دوو رۆمان نڤیسییە و ب سودفە ناڤەرۆکا هەردووان وەک هەڤ بوویە.