رەوشەنبیر و دەستەلات: هەڤدژن یان هەڤ تەمامكەرن
مشە جاران ئەڤ پرسە دهێنە كرن، ئەرێ هەلویستێ رەوشەنبیری چییە ژ دەستەلاتێ؟ ئەرێ ئەو رەوشەنبیرێ دناڤ دەستەلاتێدا بیت، هەویا خوە یا رەوشەنبیریێ ژ دەست ددەت یان هاریكارە بۆ پێشڤەبرنا بەرنامە و سیستەمێ دەستەلاتێ؟ ئەرێ ما مە رەوشەنبیر هەنە؟
گەلەك ژ نڤیسەر و هەڤالێن رەوشەنبیر بابەتێن هەمەجۆر و بوچوونێن جوداجودا ل سەر ڤێ چەندێ نڤیسینە و بەلاڤكرینە. لێ بابەت ب خوە یێ گەرمە و بەردەوامە، ئەم ژی دێ هەولدەین هندەك ژ بوچوونێن خوە ل سەر ڤی بابەتی دارێژین، بەلكو لبنەكا دی یا بچووك بكەڤیتە سەر ئاڤاهیێ ڤی بابەتێ گرنگ و كاریگەر د جڤاكێ مەدا. سیستەمێ هەر دەستەلاتەكێ ژ هندەك بنەمایێن یاسایی و عورفێن جڤاكی پێك دهێت، ئەڤجا مادەم عورفێن جڤاكی ژی ب كاریگەری رۆلێ خوە د سیستەمیدا دبینن، هەر كەسەكێ ماف هەیە بوچوونێن خوە ل سەر دارێژیت و پشكداریێ د ئاڤاكرنێدا بكەت. لێ پرسا هەرە گرنگ ئەوە كو ئەم بكارین جوداهی یێن خوە یێن تێهزرینێ قەبوولكەین و رێزێ ل هزرا بەرامبەر بگرین. چونكو پێكڤە ژیان و هەڤ قەبوولكرن دەسپێكا پێڤاژۆیا درێژا مومارەسەكرنا دیموكراسیێیە دناڤ جڤاكیدا، نەمازە جڤاكەكێ موزاییكیێ وەكو جڤاكێ كوردی.
دەستەلات و رەوشەنبیر
هەڤكێشا دەستەلات/ رەوشەنبیر، هەڤكێشەكا كەڤنە و ب كەڤناتى یا ئێكەمین دۆزا بەرەڤانیكرنێ ژ ئەوێ دی و خەلكیڤە هەڤبەندە. ل سالا ١٨٩٤ ێ دۆزا دریفۆس مینا بۆیەرەكێ رەوشەنبیری و رۆلێ رەوشەنبیریێ هاتە دناڤ قادا رەوشەنبیرى یا ئەورۆپاییدا. ژبۆ شرۆڤەكرنا ڤێ هەڤبەندیێ ژی فەرە ئەم رۆلێ رەوشەنبیریێ شرۆڤەكەین و هەویا دەستەلاتا ل بەرامبەر دەسنیشانكەین.
ئەگەر رەوشەنبیری بزڤاندنا مەژی و هەولدانا دیتنەكا دی و خواندنا روویێ دی یێ بابەتێ هەیی بیت، رەوشەنبیر ئەو كەسەیە یێ مەژی و سەربۆر و شارەزایی یێن خوە ژبۆ گێرانا رۆلەكێ رەوا و پێگیر ب دۆزا گەل و وەلاتی ددەتە كاری. ئەڤجا ئەم د كارین بێژین كو رەوشەنبیری.. گێرانا رۆلەكێ دیاركرییە، هەروەكو ئەنتونیۆ گرامشی دبێژیت كو هەمی كەس ل گورەی جھ و كارێ خوە رەوشەنبیرن، لێ هەمی كەس رۆلێ رەوشەنبیریێ ناگێرن. پرسیار ل ڤێرە ئەوە، ئەرێ مەرجە د هەموو جاراندا رۆلێ رەوشەنبیری دژایەتیکرنا دەستەلاتێ بیت؟ یان ئەرێ رەوشەنبیرێ بێلایەن هەیە؟ كییە؟ رۆلێ وی چییە؟
ئەدوارد سەعید،رەوشەنبیرەكێ عەرەبە، د ڤی واریدا دبێژیت كو رەوشەنبیر نوونەرێ هشیارى یا خەلكییە، ئەركێ وی یێ سەرەكی نڤیسین و خویاكرنا داخوازی و ماف و ئارێشێن خەلكێ هەچكوهەیی (عادی) یە، ب ڤێ چەندێ ژی چ رەوشەنبیر بێلایەن نینن. ئەڤ نە بێلایەنكرنا رەوشەنبیران چەپەرەكی پەیدا دكەت، بێهنا رەش و سپیاتیێ ژێ دهێت. لەوا فەرە ئەم هەویا دەستەلاتێ دەسنیشانكەین.
هەر دەستەلاتەكا ل دژی هیڤی و خواست و مافێن مللەتی كار بكەت، ژ لایێ رەوشەنبیریڤە دێ یا رەتكری و رەش بیت، ئوو هەر رەوشەنبیرەكێ دگەل وێ دەستەلاتێ كاركەت، دێ مەزنترین گونەهبار بیت. لێ ئەگەر هەمی مەرەم و ئارمانجێن دەستەلاتێ دابینكرنا مافێن رەوایێن مللەتی بیت (مینا؛ دەستەلاتا د قۆناغێن شۆرەشگێری و رزگاریخوازیێدا)، رەوشەنبیر ژی وەكو ئەندامەكێ جڤاكی دێ خوە ل ڤێ دۆزا وەلاتینی و نەتەوەییێ كەتە خودان.
ئەگەر ڤەگەرینە سەر رەوشەنبیرێ كورد، مانا وی ژ دەرڤەی دەستەلاتێ (دەستەلاتا رژێما عیراقێ یا هلوەشیایی) هەلویستەكێ مللەتینی و نەتەوەیی بوو، چونكو دەستەلاتا هەبوویی ل دژی مافێن رەوا یێن مللەتێ وی كار د كر. هەر رەوشەنبیرەكێ خوەدی هەلویست ل چەپەرێ دژی دەستەلاتێ خەبات دكر. ژبەر ڤی هەلویستی ژی كومەكا رەوشەنبیران هاتینە سەرگونكرن و زیندانكرن و كوشتن، كومەكا رەوشەنبیران ژی رێكخستنێن فەرمی ل دژی دەستەلاتێ چێكرینە. ئەڤجا وەكو ئەنجامێ ڤێ خەبات و دەردەسەری و بەرخۆدانا درێژ، نهۆ ئەو دەستەلات هاتییە گوهورین و ل جهێ وێ؛ ئەو دەستەلاتەیە ئەوا رەوشەنبیران خەون پێڤە ددیتن. ژلایەكێ دیڤە ژی، چونكو پڕانى یا مللەتێ مەیێ گوندنشین و دوورە باژێر و خواندنگەھ نەخوێندەوار بوون، ئەگەر هندەك خوێندەوار هەبوو بن ژی، ژ چوارچۆڤێ حوجرەیێن مزگەفتان و ژبەركرنا هندەك ئاییردە و گۆتنێن ئایینی نە د بۆرین. ئەڤجا رەوشەنبیران رۆلەكێ بەرچاڤ هەبوو د ئاراستەكرنا هزرێن وەلاتپارێزی یێن خەلكێ كوردستانێدا. ئانكو رەوشەنبیر ب ئەركێ خوە یێ دیرۆكی رابووینە و دۆزا مللەتی بەرچاڤكرییە. هەرچەندە رۆلێ رەوشەنبیران د ناڤ میرگەهێن كوردیدا هەبوویە، چ ژبۆ پاراستنا دەستەلاتا میرگەهێ یان ژبۆ راستڤەكرنا رەفتارێن میران بیت (وەكو هەلویستێ دگەل دۆزا مللەتی ل هەمبەری دەستەلاتێ). لێ رۆلێ نەتەوەپارێزیێ ل كوردستانا باشۆر دگەل هەولدان و تێكوشینا بزاڤێن شێخ عەبدلسەلامێ بارزانی دەست پێكرییە و د شۆرەشێن شێخ مەحموودێ حەفید و شۆرەشێن بارزان را بۆرییە و ل داوى یا سالێن سیهان وەراركرییە و ل سالا ١٩٤٦ ئێكەمین رێكخستنا ب هێز و سەرانسەری دامەزراندییە (ل وی سەردەمی رێكخستنێن كومۆنیستان گرنگییەكا بەرچاڤ نە ددا نەتەوەپارێزیێ). پاشی ل شۆرەشا ئیلۆنا مەزن پێشمەرگێ كوردستانێ ب سەركردایەتى یا بارزانیێ نەمر مەزنترین شۆرەشا چەكداری یا كوردی ژبۆ ب دەستڤە ئینانا مافێن رەوا یێن مللەتێ كورد هەلگیرساند و مل ب ملێ هەر قۆلەكێ پێشمەرگەی كادرەكێ رەوشەنبیر هەبوو.
ئوو هوسا رەوشەنبیر تەڤلیهەڤی دەستەلاتێ بوون. دەستەلاتا دناڤ بزاڤا رزگاریخوازیێدا جودایە ژ دەستەلاتا ددەمێ ئێمناهیێ و دەسكەفتاندا. د سەردەمێ ئێكێدا قوربانیدان و خزمەتكرنا دۆزا وەلاتییە، لێ د سەردەمێ دووێدا (دگەل یا ئێكێ) پاراستنا بەرژەوەندێن دەستەلاتێ ژی دهێتە سەر، گەلەك جاران دناڤ پاراستنا گشتی یا دەستەلاتێدا، پاراستنا بەرژەوەندێن كەسۆكی ژێ سەر هلددەت. سەركردایەتى یا شۆرەشا ئیلۆنێ و پاشی ب شێوەیەكێ نەمازەیی پێشەوا یێن شۆرەشا گۆلانا پێشكەفتنخواز ژی گرنگییەكا زۆر ددا پێگەهاندنا كادرێن شۆرەشێ و خۆلێن رەوشەنبیركرنا كادران د بەردەوام بوون. ب ڤێ چەندێ ژى، كادرێن رەوشەنبیر دگەل شۆرەشێ بوون و مەزن بوون و گەهشتنە وێ دەستەلاتا هەمی مللەتی خەون پێڤە ددیتن. ئەڤ تەڤلیهەڤبوونا رەوشەنبیران دگەل دەستەلاتێ یا بەردەوامە و رۆژ بۆ رۆژێ مەزنتر و بەرفرەهتر لێ دهێت و د وەرارەكا بەردەوامدایە. لێ پرسیارا گرنگ ئەوە؛ ئەرێ ئەڤ تەڤلهەڤبوونە پۆزەتیڤە یان نێگەتیڤە؟
ئەز ب خوە نە دگەل ڤێ پرسیارا رەهایی یا ب ڤی شێوەیمە، چونكو هەر لایەنەكێ تو بگری بۆ جڤاكێ مە گەلەك نێزیكی راستیێ نا بیت، لەوا ئەم د كارین پۆزەتیڤی و نێگەتیڤی یا ڤێ دیاردێ ب ئاوایەكێ دی خویاكەین. هەر رەوشەنبیرەكێ پێگیر ب دۆزا مللەتی و بەرژەوەندا بلندا وەلاتیڤە، هەبوونا وی د هوندرێ دەستەلاتێدا پۆزەتیڤە. فەرە نەهێتە ژبیركرن ژی كو هەر رەوشەنبیرەكێ دەستەلاتێ (مەرەم پێ دەستەلاتا كوردستانێیە) ئامادەبوونا خوە یا مینەڤی و گێتیكی هەیە. لێ دەمێ رەوشەنبیر ژبۆ بەرژەوەندێن بەرتەنگێن كەسۆكی د مینتە د هوندر دەستەلاتێدا نێگەتیڤە و نە مینیت باشترە. چونكو ئەو ئێدی نەكاریت چ بەرهەمەكێ مفادار پێشكێشی خەلكێ خوە بكەت.
خالەكا دی یا گرنگ هەیە، ئەو ژی ئەوە كو دەستەلات د كوردستانێدا، دەستەلاتا پارتیانە، هەر پارتەكا د دەستەلاتێدا بەرنامە و پرۆگرامێ خوە هەیە و د پڕانى یا جاراندا بەرنامە گەلەك سەرنجڕاكێش و مودێرنن، د بەرژەوەندا خەلكیدانە. ئەڤجا ب هزرا من رەوشەنبیر تێدا بن بیاڤێ ئەنجامدان و بكارئینانا دروست یا بەرنامەی دێ پتر بیت، چونكو دبنەرەتدا رەوشەنبیران ئەو بەرنامە داناینە. لێ ئەگەر رەوشەنبیر ببیتە داردەست و دەهۆلقوتێ نە رەوشەنبیران ژبۆ ب دەستڤە ئینانا بەرژەوەندێن بەرتەنگێن كەسۆكی، هینگی ساخلەتێ رەوشەنبیریێ پێڤە نامینیت و دێ بیتە كەسەكێ دی.
ب كورتی دبێژم ما دەم مە گۆت رەوشەنبیر، فەرە ل هەر جھ و هەر دەم رۆلێ خوە یێ كاریگەر و پۆزەتیڤ بگێریت. ئەگەر وە نە بیت، فەرە بێژینێ كرێگرتی یان خۆفرۆش یان ئەوێن كارێ مینا رەوشەنبیریێ دكەن. لێ نە رەوشەنبیرن. ب مخابنیڤە دبێژم، پشتى فرۆشتنا نەفتێ و هاتنا بودجەیەکا مەزن بۆ حکومەتا کوردستانێ, ئێدى ئەو رۆژ یا هاتى کو ئەو رەوشەنبیرێن کار ژبۆ چێکرنا ڤێ دەستەلاتێ دکرن، نهۆ گێرێ خوە بگوهورن و رۆڵێ خوەیێ خوە یێ رەوشەنبیریێ بگێرن کو بەرەڤانیکرنە ژ ماف و داخوازى یێن مللەتى, یان ب کێمى ئازراندن و بەرچاڤکرنا ئارێشێن خەلکێ هەچکوهەییێ وەڵاتپارێزە.
رەوشەنبیر وەكو شیرەتكارێ دەستەلاتێ
مشە جاران رەوشەنبیرێ دناڤ پرۆسا دەستەلاتداریێدا، ئاوایێ شیرەتكارەكێ ئاراستەکار یان گوهدار وەردگریت. دبیت شیرەتکارى رۆڵەکێ کاریگەر و ئاراستەکار هەبیت، دبیت ژى تنێ هندەک پێشنیازێن تایبەت و ددەمێن تایبەتدا پێشکێشى دەستەلاتدارى بکەت. نەدوورە تنێ ناڤ بیت و وەکو پاداشت پێ هاتبیتە بەخشین کو پلە و پایەکێ دیارکرى دناڤ جڤاکیدا هەبیت و چ جاران مایێ خوە د چ تشتاندا نەکەت. ل ڤێرە پرسیارەك د كەفتە قادێ؛ ئەرێ ما دەستەلاتێ باوەری ب شیرەتکارێ ئاراستەکار (کەسەکێ رەوشەنبیر) هەیە، یان تنێ ناڤەكە ژبۆ مەرەمێن تایبەت هاتییە دانان؟ ئەرێ بوچوونێن وی یێن ئاڤاكەر (ئەگەر ئاڤاكەر بن) ل بەر چاڤ دهێنە وەرگرتن یان ژی پێرینەیەكە ژبۆ بەهانەكرن و رەواكرنا ئەوا بوویی و ئەوا دبیتن؟
هەروەكو مە گۆتی گرنگ هەویا دەستەلاتێیە، دەستەلاتا بڤێت وەلاتی كونترۆلكەت و هەمی بڕیار ژ سەری بهێنە خوارێ بێی ل بەر چاڤگرتنا بوچوون و خواستێن خەلكی، ڤی جۆرێ دەستەلاتێ رەوشەنبیر نەڤێن یان پێدڤی پێ نینە، چونكو نە شێت رەئیا بەرامبەر قەبوولكەت. ئەگەر هەولدەت رەوشەنبیران بكار بینیت ژی، دێ ل گورەى حەز و خواستێن خوە یێن تایبەت بکار ئینیت، نە ل گورەى رۆڵێ وى د پێشڤەبرن و چاکسازیێدا. ئەم د كارین بێژینێ کڕینا رەوشەنبیرەکی یان ژى بکارئینانا رەوشەنبیرەکێ خۆفرۆشتى، ب ڤێ چەندێ ژى سیفەتێ رەوشەنبیریێ نامینتە ل سەر. كڕینا رەوشەنبیران ژی ژبۆ گەهشتنا مەرەمێیە. ئەڤجا چ ب ناڤێ راوێژكار بیت یان كارگێرەكێ كارا بیت دناڤ دەستەلاتێدا، ئەڤ كەسێن ب ڤێ رەوشێ قاییل دبن ژ رەوشەنبیران نا هێتە حسێب كرن و ئارێشەیا دەستەلاتێ دگەل رەوشەنبیران و رەوشەنبیریێ دێ یا بەردەوام بیت.
لێ ئەگەر مەرەما دەستەلاتێ هشیاركرنا خەلكی بیت و فێركرن و راهێنانا ل سەر دیموكراسیێ بیت، هینگێ نە تنێ دەستەلات دێ باوەریێ ب رەوشەنبیری ئینیت، بەلكو دێ رێخۆشكەر بیت ژی. هینگی رەوشەنبیر ژی دێ ب سەربلندی دناڤ دەستەلاتێدا كاركەت و دێ رۆلێ خوە یێ رەوشەنبیریێ گێریت.
د پڕانى یا وەلاتێن جیهانێدا (چ پێشكەفتی بن یان نە پێشكەفتی)، دەستەلاتێ شیرەتكار هەنە و ئەڤ شیرەتكارە ل پشت پەردەیان سیاسەتا دەولەتێ یان سیستەمێ دەستەلاتێ د دانن و ب رێڤە دبەن. دەستەلات ژی ل گورەی مەرەم و سیاسەتا خوە، شیرەتكاران ددانن، ئەوێن پێشكەفتنخواز رەوشەنبیرێن پێشكەفتنخواز د دانن و ئەوێن ل سەر هەژاری و كەدا مللەتی د ژین سەرەدەریێ دگەل رەوشەنبیرێن كێم سەربۆر و بێ هەلویست دكەن (ئەوێن ب ناڤ رەوشەنبیر یان هەر دبنەرەتدا نە رەوشەنبیر)، ئەڤە ژی هەروەك مە گۆتی نە رەوشەنبیرن و مللەت چ حسێبا بۆ ناكەت.
لێ ئەگەر ئەم سەرەدەریێ دگەل جڤاكا كوردی بكەین، بەری ڤێ هەڤكێشێ، مە هەڤكێشا هەبوون یان نەبوونا رەوشەنبیری هەیە. كییە رەوشەنبیرێ كورد؟ گۆتارا رەوشەنبیرى یا كوردی ژ چ پێك دهێت؟ ئەرێ رەوشەنبیر ئەوە یێ خوەدی سەربۆرەك ئەپستمی بیت یان ئەوە یێ نە ل كوردستانێ ژیا بیت؟ ئەرێ رەوشەنبیر ماموستایێ زانینگەهێیە و بەس یان ئەوە یێ خوە ل دۆزا مللەتی بكەتە خودان و بەرەڤانیێ ژ مافێن خەلكی بكەت؟ ..... هد؟
گەلەك برادەر هەنە وەسا هزر دكەن كو مە ل كوردستانێ رەوشەنبیر نینن، دپڕانى یا جاراندا ئەوێن ژ دەرڤەی وەلاتی ڤەدگەرنەڤە، ب چاڤەكێ كێم هێڤ د كەنە سەربۆرا هەیی، چونكو وان سەربۆرەكا باشتر و كاریگەرتر ل وەلاتێن ژێ هاتین دیتینە، لەوا دێ هزركەن كو پرۆسا رەوشەنبیریێ ل دەڤەرا كوردستانێ سفرە. دبیت تا راددەكی حەق بن ژی، چونكو نە یا بەرهۆزە كەسەكێ خواندەڤان و كەسەكێ مینا گرامشی (كو مە ناڤێ وی د ڤێ گۆتارێدا کرییە رەوشەنبیر) ب وەكهەڤی ناڤێ رەوشەنبیری ل سەر بیت!
ب هزرا من، ئەڤ شێوازێ رەهاییێ هەڤبەركرنێ، مە گەلەك نێزیكی راستیێ ناكەت، چونكو رەوشەنبیرێ هەر مللەتەكی بەرهەمێ كلتۆر و هەڤبەندی یێن بەرهەمهێنانا هزری و جڤاكییە، ئەڤجا د هەمی جڤاكاندا رەوشەنبیر هەنە. ئاستێ كاریگەری و نە كاریگەری یا رەوشەنبیریێ ب پیڤانەكا ستوونی یا پێڤاژۆیا وەرارا جڤاكی د هێتە پیڤان و هەڤبەركرن. هەر دەمێ ئەم ب شێوەیێ ئاسویی دگەل جڤاكێن دی هەڤبەركەین (نەمازە جڤاكێن پێشكەفتی)، هینگی دوور نینە پتر نێزیكی شاشیێ ببین ژ راستیێ. هەرچەندە رەوشەنبیر ب داهێنانێ و ئازراندنا پرسێن نە ئازراندیڤە هەڤبەندە، لێ ئەڤ پرۆسەیە ل سەر ئاستێ كەسۆكیێ رەوشەنبیری د هێتە ئاڤاكرن و ئەم د كارین ب ڤێ هاوكێشێ كورتكەین:
١. رەوشەنبیر ١
هەلسەنگاندن و تێگەهشتن + یاخیبوون و رەخنەگرتن + گوهورین و نووكرن = ڤەگەران بۆ ناڤ جڤاكی ژبۆ گوهارتنا جڤاكی بەر ب رەوتەكا دی یا پێشكەفتیترڤە.
٢. رەوشەنبیر ٢
هەلسەنگاندن و تێگەهشتن+ نە یاخیبوون و رازیبوون + پاراستنا ئەوا هەیی = مان دناڤ خۆشی یا جڤاكیدا.
ل گورەی ئەوا مە گۆتی، رەوشەنبیرێ١ كاریگەرە و رۆلێ خوە یێ رەوشەنبیریێ د گێریت. هەبوونا وی دناڤ دەستەلاتێدا خالەكا پۆزەتیڤە. لێ رەوشەنبیرێ ٢ ئەو ژی رەوشەنبیرە، دبیت د هەمان ئاستێ رەوشەنبیرێ (١) دا بیت، لێ رۆلێ خوە یێ رەوشەنبیریێ نا گێریت و هەبوونا وی دناڤ دەستەلاتێدا ب نێگەتیڤی و خوە فرۆتن دهێتە نیاسین. ب ڤێ چەندێ ئەم دگەهینە وێ راستیێ كو هەمی جڤاكان ب ئاستێن جوداجودا رەوشەنبیر و رەوشەنبیری هەنە، لێ پرس د گێرانا رۆلێ رەوشەنبیریدا یە.
پرسا متمانە و باوەریێ دناڤ هەڤكێشا رەوشەنبیر و دەستەلاتێدا پرسەكا دوو جەمسەرە، هەردەمێ رەوشەنبیری باوەری ب دەستەلاتێ ئینا كو نوونەرا گەل و وەلاتییە، دێ دناڤدا كاركەت و دەستەلات ژی دێ باوەریێ پێ ئینیت. ئەڤ باوەریا ئالوگۆر ژی دەستەلاتێ ژ كریارێن باش نێزیك د كەت و ژ شاشییان دوور دكەت. لێ هەر رەوشەنبیرەكێ داردەستێ دەستەلاتەكێ بیت، نەكاریت ب ئازادی رەخنێ لێ بگریت. چونكو دەما رەخنە ل سیستەم و بەرنامەیا خوە گرت ئێدی وەكو رەوشەنبیر نامینتە دناڤ وێ دەستەلاتێدا. لێ مە ل دەسپێكێ گوتییە كو ئەو رەوشەنبیرێ خوە تەسلیمی دەستەلاتەكا نە پێشكەفتنخواز و نە دبەرژەوەندا مللەتیدا بكەت، رۆلێ وی یێ رەوشەنبیریێ ڤێ نا مینیت. د پڕانى یا پارتێن دەستەلاتداردا برگەیا رەخنە و رەخنە ل خوە گرتنێ هەیە، ئەڤ برگەیە لاستیكییە و رەوشەنبیر د كاریت مفای ژێ وەرگریت كو كریارا رەخنە گرتنێ بەردەوامكەت.
رەوشەنبیر؛ ئانكو رەخنە گرتن. نزیكبوون ژ دەستەلاتێ؛ ئانكو دیتنا بیاڤەكێ خورتتر ژبۆ رەخنە گرتن و بەرڤانیكرنێ ژ مافێن خەلكی. ب هزرا من، هەر كریارەكا ژ ڤی چوارچوڤەی ڤەدەر بیت، چ هەڤبەندی ب رەوشەنبیر و رەوشەنبیریێڤە نینە.
ل گورەی گۆتنێن من یێن پێشین، رەوشەنبیر و دەستەلات یێن کەفتینە دناڤ دووانییەکا هەڤدژ یان هەڤڕا دا. ئەڤ دووانییە ل سەر هەویا دەستەلاتێ و هەلویستێ رەوشەنبیری ل هەمبەری وێ دەستەلاتێ رادوەستیت. رەوشەنبیران ئاگرێ شۆرەش و خەباتێ ( ب شێوازێ خوە یێ ئاشتیخوازانە- ب قەلەمی) گەرمكرییە و دناڤدا كار دكەن، ژهەڤ نێزیكن. هەردەمێ لادان ژ رێكا خەباتێ و یاسایێن ب رێڤەبرنا وەلاتی بهێتە كرن، هەر ب هەمان شێوازێ خوە یێ ئاشتیخوازانە – ب قەلەمی دێ ژ دەستەلاتێ دوور كەڤن.
ل داویێ ئەز وەسا دبینم، ژبۆ قۆناغا مە یا نهۆ، سەرەرای هەبوونا گەلەك كێماسییان ژی، فەرە رەوشەنبیر خوە ژ دەستەلاتێ نێزیك كەت. نە ژبۆ ب دەستڤە ئینانا دەسكەفت و بەرژەوەندان، لێ ژبۆ پشكداریكرنێ د ئاڤاكرنا جڤاكەكێ سڤیل و پێشكەفتنخوازدا. جڤاك ب بڕیاران پێش ناكەڤن، لێ ب مومارەسەكرنێ و پێكڤە ژیانێ و قەبوولكرنا هزرا بەرامبەر پێش دكەڤن. ئەگەر دەستەلاتێ ئەڤ پێكڤە ژیانە قەبوول نەكر، جھ و هەلویستێن رەوشنبیری د دیارن كا ل كیڤەنە.
دهۆک/ ٢٠٠٧